Times of Deenabandhu
  • Home
  • ಪ್ರಧಾನ ಸುದ್ದಿ
  •  ನಿಮ್ಮ ಪುಟ್ಟ ಮಗುವಿಗೆ ಸ್ನಾನ ಮಾಡಿಸುವಾಗ ಈ ತಪ್ಪುಗಳನ್ನು ಎಂದಿಗೂ ಮಾಡಬೇಡಿ
ಪ್ರಧಾನ ಸುದ್ದಿ ಮುಖ್ಯಾಂಶಗಳು

 ನಿಮ್ಮ ಪುಟ್ಟ ಮಗುವಿಗೆ ಸ್ನಾನ ಮಾಡಿಸುವಾಗ ಈ ತಪ್ಪುಗಳನ್ನು ಎಂದಿಗೂ ಮಾಡಬೇಡಿ

ಮಕ್ಕಳಿಗೆ ಸ್ನಾನ ಮಾಡಿಸುವುದು ಒಂದು ಕಲೆ. ಅದರಲ್ಲೂ ನವಜಾತ ಶಿಶುಗಳಿಗೆ ಮತ್ತು ಪುಟ್ಟ ಕಂದಮ್ಮಗಳಿಗೆ ಸ್ನಾನ ಮಾಡಿಸುವ ನೀರು ಇಷ್ಟವಾಗುವಂತೆ ಪೋಷಕರು ವಾತಾವರಣ ನಿರ್ಮಾಣ ಮಾಡಬೇಕು. ತುಂಬಾ ಮಕ್ಕಳು ಮೊದಮೊದಲು ನೀರಿಗೆ ಭಯ ಪಡುತ್ತಾರೆ ಮತ್ತು ಸ್ನಾನ ಮಾಡಿಸಲು ಹೋದ ಕ್ಷಣದಲ್ಲಿ ಅಳಲು ಶುರು ಮಾಡುತ್ತಾರೆ. ಆದರೆ ದಿನ ಕಳೆದಂತೆ ಇದೊಂದು ಅಭ್ಯಾಸವಾಗಿ ನಂತರ ನೀರಿನಲ್ಲಿ ಸ್ನಾನ ಮಾಡುವುದನ್ನು ತಮ್ಮ ಆಟದ ಒಂದು ಭಾಗವಾಗಿ ತಮ್ಮ ಮೆದುಳಿನಲ್ಲಿ ಶೇಖರಣೆ ಮಾಡಿಕೊಳ್ಳುತ್ತಾರೆ.

ಮಕ್ಕಳಿಗೆ ಸ್ನಾನ ಮಾಡಿಸುವ ವಿಚಾರದಲ್ಲಿ ಪೋಷಕರ ಜವಾಬ್ದಾರಿ ಅತಿ ಮುಖ್ಯ. ಯಾವುದೇ ಕಾರಣಕ್ಕೂ ಪುಟ್ಟ ಮಕ್ಕಳನ್ನು ಬಾತ್‌ಟಬ್‌ನಲ್ಲಿ ಸ್ನಾನ ಮಾಡಲು ಬಿಟ್ಟು ಪೋಷಕರು ಸ್ನಾನದ ಮನೆಯಿಂದ ಹೊರಗೆ ಇರಬಾರದು. ಇದೇ ರೀತಿ ಇನ್ನೂ ಹತ್ತು ಹಲವು ಮುಂಜಾಗೃತಾ ಕ್ರಮಗಳನ್ನು ಪೋಷಕರು ತೆಗೆದುಕೊಳ್ಳಬೇಕು. ಈ ಲೇಖನದಲ್ಲಿ ಇಂತಹ ವಿಚಾರಗಳ ಬಗ್ಗೆ ಗಮನಹರಿಸಲಾಗಿದೆ.
ಬಾತ್‌ರೂಮ್‌ನಲ್ಲಿ ಮಗುವನ್ನು ಬಿಟ್ಟು ನೀವು ಹೊರ ನಡೆಯದಿರಿ..
ಇದೊಂದು ವಿಚಾರ ಬಹಳಷ್ಟು ಪೋಷಕರು ಮಾಡುವ ನಿರ್ಲಕ್ಷತೆ ಎಂದು ಹೇಳಬಹುದು. ಮಕ್ಕಳಿಗೆ ಸ್ನಾನ ಮಾಡಿಸಲು ನೀವು ಒಂದು ವೇಳೆ ಬಾತ್‌ಟಬ್ ಬಳಸುತ್ತಿದ್ದರೆ, ಸಂಪೂರ್ಣವಾಗಿ ಮಗುವಿನ ಸ್ನಾನ ಮುಗಿಯುವವರೆಗೂ ನೀವು ಅಲ್ಲೇ ಇದ್ದು, ತುಂಬಾ ಜಾಗರೂಕವಾಗಿ ನಿಮ್ಮ ಮಗುವನ್ನು ನೋಡಿಕೊಂಡು ಹೊರಗಡೆ ಬರಬೇಕಾದರೆ ನಿಮ್ಮ ಮಗುವನ್ನು ನಿಮ್ಮ ಜೊತೆಗೆ ಕರೆದುಕೊಂಡು ಬರಬೇಕು. ಸ್ನಾನಕ್ಕೆ ಉಪಯೋಗಿಸುವ ಬಾತ್‌ಟಬ್ ತುಂಬಾ ನುಣುಪಾಗಿರುವುದರಿಂದ ಮತ್ತು ಸೋಪಿನ ನೀರು ತುಂಬಿರುವುದರಿಂದ ನಿಮ್ಮ ಮಗು ನೀರಿನೊಳಗೆ ಜಾರುವ ಸಾಧ್ಯತೆ ಜಾಸ್ತಿ ಇರುತ್ತದೆ. ಕೇವಲ ಕಣ್ಣು ಮಿಟುಕಿಸುವ ಕ್ಷಣದಲ್ಲಿ ತುಂಬಾ ದೊಡ್ಡ ಅನಾಹುತ ನಡೆದು ಹೋಗುತ್ತದೆ. ಹಾಗಾಗಿ ಮಗುವಿಗೆ ಸ್ನಾನ ಮಾಡಿಸಲು ಮುಂದಾದ ಸಮಯದಲ್ಲಿ ಯಾವುದೇ ಕಾರಣಕ್ಕೂ ಮಗುವಿಗೆ ಸ್ನಾನ ಮಾಡಿಸುತ್ತಿರುವ ವ್ಯಕ್ತಿ ಮಗುವನ್ನು ಅಲ್ಲೇ ಬಿಟ್ಟು ಎದ್ದು ಹೋಗಲೇಬಾರದು. ಏನಾದರೂ ವಸ್ತುಗಳು ನಿಮಗೆ ಬೇಕಿದ್ದರೆ ಬೇರೆಯವರನ್ನು ಕೂಗಿ ನೀವು ಇರುವ ಜಾಗಕ್ಕೆ ತರಿಸಿಕೊಳ್ಳುವುದು ಒಳ್ಳೆಯದು. ಮಗುವಿಗೆ ಸ್ನಾನ ಮಾಡಿಸುವ ಸಂದರ್ಭದಲ್ಲಿ ಫೋನಿನ ಕಡೆಗೆ ಅಥವಾ ಟಿವಿಯ ಕಡೆಗೆ ನಿಮ್ಮ ಗಮನವನ್ನು ಕಡಿಮೆ ಮಾಡಿ.
ಬಾತ್‌ಟಬ್‌ಗೆ ನೀರು ಹರಿಸುವ ಸಂದರ್ಭದಲ್ಲಿ ಎಚ್ಚರವಿರಲಿ..
ಸಾಧಾರಣವಾಗಿ ಎಲ್ಲರೂ ಸ್ನಾನ ಮಾಡುವ ಮುಂಚೆ ತಮಗೆ ಅನುಗುಣವಾದ ಮಟ್ಟಕ್ಕೆ ಸರಿಯಾಗಿ ಬಾತ್‌ಟಬ್‌ನಲ್ಲಿ ನೀರು ತುಂಬಿಕೊಂಡು ನಂತರ ಸ್ನಾನಕ್ಕೆ ಇಳಿಯುತ್ತಾರೆ. ಇದು ಮಗುವಿನ ವಿಷಯದಲ್ಲೂ ಆಗಬೇಕು. ಬಹಳಷ್ಟು ಎಚ್ಚರಿಕೆಯಿಂದ ಇದೊಂದು ವಿಚಾರದಲ್ಲಿ ಪೋಷಕರು ಗಮನ ವಹಿಸಬೇಕು. ಮಗುವನ್ನು ಬಾತ್‌ಟಬ್‌ಗೆ ಕೂರಿಸುವ ಮುಂಚೆ ಸರಿಯಾದ ನೀರಿನ ಮಟ್ಟ ಮತ್ತು ಮಗುವಿಗೆ ಅನುಕೂಲವಾದ ನೀರಿನ ತಾಪಮಾನ ಇದೆಯೇ ಎಂಬುದನ್ನು ಮೊದಲು ಪರೀಕ್ಷಿಸಿ. ಯಾವುದೇ ಕಾರಣಕ್ಕೂ ನೀರು ನಲ್ಲಿಯಿಂದ ಬಾತ್‌ಟಬ್‌ಗೆ ಸುರಿಯುತ್ತಿರುವ ಸಂದರ್ಭದಲ್ಲಿ ಮಗುವನ್ನು ಅದರೊಳಗೆ ಕೂರಿಸಲು ಮುಂದಾಗಬೇಡಿ. ಏಕೆಂದರೆ ಹರಿಯುವ ನೀರು ನಿಂತಿರುವ ನೀರನ್ನು ಸೇರಿಕೊಂಡಾಗ ನೀರಿನ ತಾಪಮಾನ ಬದಲಾಗುತ್ತದೆ. ಇದರಿಂದ ಮಗುವಿಗೆ ಶೀತವಾಗುವ ಅಥವಾ ಹೆಚ್ಚಾದ ನೀರಿನ ತಾಪಮಾನದಿಂದ ಮಗುವಿನ ಮೃದುವಾದ ಚರ್ಮ ಸುಟ್ಟು ಹೋಗುವ ಸಾಧ್ಯತೆ ಇರುತ್ತದೆ. ಜೊತೆಗೆ ನೀರಿನ ಮಟ್ಟ ಹೆಚ್ಚಾದಷ್ಟು ನಿಮ್ಮ ಮಗು ಬಾತ್‌ಟಬ್‌ನಲ್ಲಿ ಜಾರಿ ಮುಳುಗುವ ಸಾಧ್ಯತೆ ಕೂಡ ಇರುತ್ತದೆ.
ಇದರ ಜೊತೆಗೆ ಪೋಷಕರು ಗಮನಿಸಬೇಕಾದ ಇನ್ನೊಂದು ವಿಚಾರವೆಂದರೆ ಮಗುವಿನ ಕಿವಿಗಳು. ಪುಟ್ಟ ಮಗುವಿನ ಕಿವಿಗಳು ತುಂಬಾ ಸೂಕ್ಷ್ಮವಾಗಿರುತ್ತವೆ. ನಲ್ಲಿಯಿಂದ ನೀರು ಬೀಳುತ್ತಿರುವ ಶಬ್ದ ಮಗುವಿನ ಕಿವಿಗಳಿಗೆ ತುಂಬಾ ಗಾಢವಾದ ಶಬ್ದದಂತೆ ಕೇಳಿಸಬಹುದು. ಇದರಿಂದ ಮಗು ಹೆದರಿಕೊಳ್ಳುವ ಸಾಧ್ಯತೆ ಇರುತ್ತದೆ ಮತ್ತು ಇನ್ನೆಂದಿಗೂ ಬಾತ್‌ಟಬ್‌ನಲ್ಲಿ ಸ್ನಾನ ಮಾಡಲು ನಿರಾಕರಿಸಬಹುದು.

ಮಗುವಿಗೆ ಸ್ನಾನ ಮಾಡಿಸುತ್ತಿರುವ ನೀರಿನ ತಾಪಮಾನದ ಬಗ್ಗೆ ಗಮನ ಇರಲಿ..
ಪುಟ್ಟ ಮಗುವಿಗೆ ಯಾವುದೇ ಕಾರಣಕ್ಕೂ ತುಂಬಾ ಹೆಚ್ಚು ಸುಡುವ ನೀರನ್ನು ಸ್ನಾನ ಮಾಡಿಸಲು ಬಳಸಬಾರದು. ಏಕೆಂದರೆ ಮಕ್ಕಳ ಚರ್ಮ ಮತ್ತು ದೇಹದ ಅಂಗಾಂಗಗಳು ಆಗ ತಾನೆ ಬೆಳವಣಿಗೆ ಹೊಂದುತ್ತಿರುವ ಕಾರಣ ತುಂಬಾ ಸೂಕ್ಷ್ಮವಾಗಿರುತ್ತದೆ. ಆದ್ದರಿಂದ ಪೋಷಕರು ತಮ್ಮ ಮಕ್ಕಳ ಸ್ನಾನದ ನೀರಿನ ಬಗ್ಗೆ ತುಂಬಾ ಜಾಗರೂಕತೆ ವಹಿಸಬೇಕು. ಕೆಲವು ಮಕ್ಕಳಿಗೆ ತುಂಬಾ ಬಿಸಿಯಾದ ನೀರು ಸ್ನಾನಕ್ಕೆ ಬಳಸುವುದರಿಂದ ದೇಹದ ಚರ್ಮ ಸುಟ್ಟು ಹೋಗುವ ಸಾಧ್ಯತೆ ಇರುತ್ತದೆ. ಸಾಧ್ಯವಾದಷ್ಟು ಉಗುರು ಬೆಚ್ಚಗಿನ ನೀರಿನಲ್ಲಿ ಅಂದರೆ 48 ಡಿಗ್ರಿ ಉಷ್ಣಾಂಶವಿರುವ ಅಥವಾ ಅದಕ್ಕಿಂತ ಕಡಿಮೆ ಬಿಸಿ ಇರುವ ನೀರನ್ನು ಬಳಸಿ ಮಗುವಿಗೆ ಸ್ನಾನ ಮಾಡಿಸಿ. ಮಗುವನ್ನು ಬಾತ್ ಟಬ್ ನಲ್ಲಿ ಸ್ನಾನಕ್ಕೆ ಕೂರಿಸುವ ಮುಂಚೆ ನೀವು ನೀರಿನ ಉಷ್ಣಾಂಶವನ್ನು ನಿಮ್ಮ ಮಣಿಕಟ್ಟು ಅಥವಾ ಮೊಣಕೈ ಅದ್ದಿ ಒಮ್ಮೆ ಪರೀಕ್ಷೆ ಮಾಡಿ. ಏಕೆಂದರೆ ನಿಮ್ಮ ಈ ಭಾಗಗಳು ತುಂಬಾ ಸೂಕ್ಷ್ಮವಾಗಿರುತ್ತವೆ. ಆದ್ದರಿಂದ ಮಗುವಿನ ಮೃದು ಚರ್ಮಕ್ಕೆ ಸೂಕ್ತವಾದ ನೀರು ಇದು ಹೌದು ಅಥವಾ ಅಲ್ಲ ಎಂಬುದು ನಿಮಗೆ ತಿಳಿಯುತ್ತದೆ. ನಿಮ್ಮ ಬಳಿ ಬಾತ್ ಥರ್ಮಾಮೀಟರ್ ಇದ್ದರೆ ಇನ್ನೂ ಸೂಕ್ತ.

ಪುಟ್ಟ ಮಕ್ಕಳಿಗೆ ಸೂಕ್ತವಾದ ಸೋಪು ಮತ್ತು ಶಾಂಪೂಗಳನ್ನು ಬಳಸಿ..
ಪುಟ್ಟ ಮಗುವಿನ ಚರ್ಮ ಸ್ನಾನಕ್ಕೆ ಬಳಸುವ ಸೋಪಿನ ನೀರಿಗೆ ಹೊಂದಿಕೊಳ್ಳುವ ಹಾಗಿರಬೇಕು. ಯಾವುದೇ ಕಾರಣಕ್ಕೂ ದೊಡ್ಡವರಾದ ನೀವು ಬಳಸುವ ಸೋಪು ಅಥವ ಶಾಂಪೂಗಳನ್ನು ನಿಮ್ಮ ಪುಟ್ಟ ಮಕ್ಕಳಿಗೆ ಸ್ನಾನ ಮಾಡಿಸಲು ಉಪಯೋಗಿಸಬೇಡಿ. ಏಕೆಂದರೆ ಇದು ಪುಟ್ಟ ಮಕ್ಕಳ ಸೂಕ್ಷ್ಮವಾದ ಚರ್ಮದ ಮೇಲೆ ಅಲರ್ಜಿ, ಗುಳ್ಳೆಗಳು ಮತ್ತು ಚರ್ಮದ ಒಣಗುವಿಕೆ ಸಮಸ್ಯೆಯನ್ನು ಉಂಟು ಮಾಡಬಹುದು.

ಮೊದಲು ಮಕ್ಕಳಿಗೆ ಅಥವಾ ನವಜಾತ ಶಿಶುಗಳಿಗೆ ಸ್ಪಾಂಜ್ ಬಾತ್ ಅಥವಾ ಕೇವಲ ನೀರಿನಿಂದ ಸ್ನಾನ ಮಾಡಿಸಲು ಮುಂದಾಗಿ. ಕೆಲವು ದಿನಗಳು ನೀರಿಗೆ ನಿಮ್ಮ ಮಕ್ಕಳು ಹೊಂದಿಕೊಂಡ ನಂತರ ಮಾರುಕಟ್ಟೆಗಳಲ್ಲಿ ವಿಶೇಷವಾಗಿ ಪುಟ್ಟ ಮಗುವಿಗೆ ಎಂದೇ ಸಿಗುವ ಸೋಪು ಹಾಗೂ ಶಾಂಪುಗಳನ್ನು ತಂದು ಮಕ್ಕಳಿಗೆ ಸ್ನಾನ ಮಾಡಿಸಲು ಮುಂದಾಗಬಹುದು.
ಒಂದು ವೇಳೆ ನಿಮ್ಮ ಪುಟ್ಟ ಮಗು ಹೆಣ್ಣು ಮಗುವಾಗಿದ್ದರೆ ಯಾವುದೇ ಕಾರಣಕ್ಕೂ ಬಬಲ್ ಬಾತ್ ಮಾಡಿಸಲು ಮುಂದಾಗಬೇಡಿ. ಇದು ಆಕೆಯ ಯೋನಿಯ ಭಾಗಕ್ಕೆ ಕಿರಿಕಿರಿ ಉಂಟು ಮಾಡಿ ಆರೋಗ್ಯದ ಮೇಲೆ ಕೆಟ್ಟ ಪರಿಣಾಮ ಬೀರಬಹುದು. ಇದರಿಂದ ಮುಂಬರುವ ದಿನಗಳಲ್ಲಿ ಮೂತ್ರನಾಳದ ಸೋಂಕು ಉಂಟಾಗಬಹುದು.

ಬಾತ್ ಟಬ್ ಅನ್ನು ಚೈಲ್ಡ್ ಪ್ರೂಫ್ ಮಾಡಿ..
ಬಾತ್ ಟಬ್ ತಯಾರು ಮಾಡಿರುವವರು ಮನೆಯಲ್ಲಿರುವ ವಯಸ್ಕರನ್ನು ಗಮನದಲ್ಲಿಟ್ಟುಕೊಂಡು ತಯಾರು ಮಾಡಿರುತ್ತಾರೆ. ಅದು ನೋಡಲು ದೊಡ್ಡದಾಗಿದ್ದು, ಜಾರುವ ಸ್ವಭಾವ ಹೊಂದಿರುತ್ತದೆ. ಆದ್ದರಿಂದ ಇದು ಮಕ್ಕಳ ಅದರಲ್ಲೂ ವಿಶೇಷವಾಗಿ ಎಳೆ ಕಂದಮ್ಮಗಳ ಸ್ನಾನಕ್ಕೆ ಯೋಗ್ಯ ಅಲ್ಲವೇ ಅಲ್ಲ. ಹಾಗಾಗಿ ಪುಟ್ಟ ಮಕ್ಕಳನ್ನು ಬಾತ್‌ಟಬ್ ನಲ್ಲಿ ಸ್ನಾನ ಮಾಡಿಸಲು ಮುಂದಾಗುವ ಮುಂಚೆ ಕೆಲವೊಂದು ಮುನ್ನೆಚ್ಚರಿಕಾ ಕ್ರಮಗಳನ್ನು ನೀವು ತೆಗೆದುಕೊಳ್ಳಬೇಕಾಗುತ್ತದೆ. ಅವುಗಳೆಂದರೆ,
ಬಾತ್‌ಟಬ್ ಕೆಳ ಭಾಗದಲ್ಲಿ ಜಾರದಂತಹ ಮಗುವಿಗೆ ಒಳ್ಳೆಯ ಗ್ರಿಪ್ ಸಿಗುವಂತಹ ಬಾತ್‌ಮ್ಯಾಟ್ ಹಾಕಿ ನಂತರ ನೀರು ತುಂಬಿಸಿ.
ಬೇಬಿ ಬಾತ್ ಸಪರೇಟರ್ ಖರೀದಿಸಿ ನಿಮ್ಮ ಮಗುವನ್ನು ಬಾತ್ ಟಬ್ ನಲ್ಲಿ ಕೂರಿಸುವ ಮುಂಚೆ ಅದನ್ನು ಇರಿಸಿ. ಇದರಿಂದ ಮಗುವಿಗೆ ದೊಡ್ಡ ಬಾತ್ ಟಬ್ ನಲ್ಲಿ ಸಣ್ಣ ಜಾಗ ಮೀಸಲಾಗಿರುತ್ತದೆ.
ಬಾತ್ ಟಬ್ ನಲ್ಲಿ ಸ್ಪೋಕ್ಟ್ ಕವರ್ ಬಳಸಿ. ಇದರಿಂದ ಮಗುವಿಗೆ ಯಾವುದೇ ಚುಚ್ಚುವಂತಹ ಅಂಚುಗಳು ಇರುವುದಿಲ್ಲ.
ಒಂದು ಬಾತ್ ಥರ್ಮಾಮೀಟರ್ ನಿಮ್ಮ ಬಳಿ ಇರುವುದರಿಂದ ಮಗುವಿಗೆ ಸ್ನಾನ ಮಾಡಿಸುವ ಮುಂಚೆ ನೀರಿನ ತಾಪಮಾನವನ್ನು ತಿಳಿದುಕೊಳ್ಳುವ ಸಾಧ್ಯತೆ ಹೆಚ್ಚಿರುತ್ತದೆ.
ನಿಮ್ಮ ಸ್ನಾನದ ಕೊಠಡಿಯಲ್ಲಿ ಸ್ಲೈಡಿಂಗ್ ಗಾಜಿನ ಬಾಗಿಲುಗಳು ಇದ್ದರೆ ಮಕ್ಕಳ ವಿಚಾರದಲ್ಲಿ ಸಾಕಷ್ಟು ಸುರಕ್ಷತೆಯನ್ನು ಕೈಗೊಂಡಿದ್ದೀರಿ ಎಂಬುದು ನಿಮಗೆ ಖಾತ್ರಿ ಇರಲಿ. ಜೊತೆಗೆ ಶವರ್ ಕರ್ಟನ್ ಗಳು ನಿಮ್ಮ ಪುಟ್ಟ ಮಗುವಿನಿಂದ ಸ್ನಾನ ಮಾಡುವ ಸಮಯದಲ್ಲಿ ಸಾಧ್ಯವಾದಷ್ಟು ದೂರವಿರಲಿ.
ನಿಮ್ಮ ಮಗುವಿಗೆ ಸುರಕ್ಷಿತವಾಗಿ ಸ್ನಾನ ಮಾಡುವ ಅಭ್ಯಾಸ ಮಾಡಿಸಿ..
ಮಗುವಿಗೆ ತುಂಬಾ ಚಿಕ್ಕ ವಯಸ್ಸಿನಿಂದ ಸ್ನಾನ ಮಾಡುವಾಗ ಹೇಗೆಲ್ಲಾ ಮುನ್ನೆಚ್ಚರಿಕೆಗಳನ್ನು ಕೈಗೊಳ್ಳಬೇಕು ಎಂಬುದನ್ನು ನಿಧಾನವಾಗಿ ರೂಢಿ ಮಾಡಿಸಿ ಉದಾಹರಣೆಗೆ,
ನಿಮ್ಮ ಪುಟ್ಟ ಮಗುವಿಗೆ ಬಾತ್ ಟಬ್ ನಲ್ಲಿ ಮೊದಲು ಕುಳಿತುಕೊಳ್ಳುವ ಅಭ್ಯಾಸ ಮಾಡಿಸಿ ( ಜಾರದ ಬಾತ್ ಮ್ಯಾಟ್ ಬಾತ್ ಟಬ್ ನಲ್ಲಿರಲಿ )
ಚೂಪಾದ ಉಪಕರಣಗಳು ಮತ್ತು ವಿದ್ಯುತ್ ಉಪಕರಣಗಳು ಸ್ನಾನ ಮಾಡುವಾಗ ಮಗುವಿನ ಹತ್ತಿರ ಇಲ್ಲದಿರಲಿ.
ಬಹಳ ಹೆಚ್ಚಿನ ಹೊತ್ತು ಮಗುವನ್ನು ಸೋಪಿನ ನೀರಿನಲ್ಲಿ ಕೂರಿಸಬೇಡಿ. ಇದು ಮಗುವಿನ ಸೂಕ್ಷ್ಮ ಚರ್ಮದ ಮೇಲೆ ಕಿರಿಕಿರಿ ಉಂಟು ಮಾಡುತ್ತದೆ.
ವಾರಕ್ಕೆ ಎರಡು ಬಾರಿ ಮಾತ್ರ ನಿಮ್ಮ ಪುಟ್ಟ ಮಗುವಿಗೆ ಸ್ನಾನ ಮಾಡಿಸಿ. ಪ್ರತಿ ದಿನ ಸ್ನಾನ ಮಾಡಿಸುವುದರಿಂದ ನಿಮ್ಮ ಮಗುವಿನ ಮೃದುವಾದ ಚರ್ಮ ಒಣಗುವ ಸಾಧ್ಯತೆ ಇರುತ್ತದೆ.
ಬಾತ್ ಟಬ್ ನಲ್ಲಿ ನಿಮ್ಮ ಮಗು ಕುಳಿತುಕೊಂಡಾಗ ನೀರಿನ ಮಟ್ಟ ಮಗುವಿನ ಸೊಂಟದ ಸರಿ ಸಮನಾಗಿರಲಿ (2 ರಿಂದ 4 ಇಂಚುಗಳು ಮಾತ್ರ )
ಪುಟ್ಟ ಮಗು ಮನೆಯಲ್ಲಿದ್ದರೆ ಎಸಿ ಆನ್ ಮಾಡಬೇಡಿ. ಮಗುವಿಗೆ ಸಾಮಾನ್ಯ ಕೊಠಡಿಯ ತಾಪಮಾನ ಸೂಕ್ತವಾಗುತ್ತದೆ.
ಮಗುವಿಗೆ ಸ್ನಾನ ಮಾಡಿಸಿದ ತಕ್ಷಣ ಬಹಳ ಬೇಗನೆ ಬಟ್ಟೆಯಿಂದ ಮಗುವಿನ ತೇವದ ಮೈಯನ್ನು ಚೆನ್ನಾಗಿ ಒರೆಸಿ ಮತ್ತು ತಲೆ ಕೂದಲನ್ನು ಸಹ ಬಹಳ ಬೇಗನೆ ಡ್ರೈ ಮಾಡಿ. ಇದರಿಂದ ಮಗುವಿಗೆ ಶೀತ ಆಗುವ ಸಾಧ್ಯತೆ ಕಡಿಮೆಯಾಗುತ್ತದೆ.

Related posts

ನೇಪಾಳ ಬ್ಯಾಂಕ್​ನಲ್ಲಿವೆ ಭಾರತದ 7 ಕೋಟಿ ರೂಪಾಯಿ ಹಳೆಯ ನೋಟುಗಳು

Times fo Deenabandhu

ಕೊರೊನಾಗೆ ಸಾಂಕ್ರಾಮಿಕ ರೋಗ ಎಂದ WHO, ಕೇಂದ್ರದಿಂದ ಏ.15ರವರೆಗೆ ಪ್ರವಾಸಿ ವೀಸಾ ರದ್ದು

Times fo Deenabandhu

ಕುಟುಂಬ ರಾಜಕಾರಣದ ವಿಸ್ತರಣೆಗೆ ಗೌಡರ ಮಾಸ್ಟರ್‌ ಪ್ಲಾನ್‌, 2023ಕ್ಕೆ ಅರ್ಧ ಡಜನ್‌ ಸ್ಪರ್ಧಿಗಳು ರೆಡಿ!

Times fo Deenabandhu