Times of Deenabandhu
  • Home
  • ಪ್ರಧಾನ ಸುದ್ದಿ
  •  ಸಾವಿರ ಸಾವಿರ ಸಂಖ್ಯೆಯಲ್ಲಿ ಕೊರೊನಾ ಸೋಂಕಿತರು..! ಬೆಂಗಳೂರು ಈಗ ಸಮರಾಂಗಣ..!
ಪ್ರಧಾನ ಸುದ್ದಿ ಮುಖ್ಯಾಂಶಗಳು

 ಸಾವಿರ ಸಾವಿರ ಸಂಖ್ಯೆಯಲ್ಲಿ ಕೊರೊನಾ ಸೋಂಕಿತರು..! ಬೆಂಗಳೂರು ಈಗ ಸಮರಾಂಗಣ..!

ರಾಜ್ಯದಲ್ಲಿ ಕೊರೊನಾ ವೈರಸ್ ಕಂಗೆಡಿಸಿದೆ. ಭಾನುವಾರ ಸಾವಿರದ ಲೆಕ್ಕದಲ್ಲಿ ಪತ್ತೆಯಾದ ಕೊರೊನಾ ವೈರಸ್ ಸೋಂಕಿತರ ಸಂಖ್ಯೆ, ಸೋಮವಾರವೂ ಪುನರಾವರ್ತನೆಯಾಗಿದೆ.
ಬೆಂಗಳೂರು ಅಕ್ಷರಶಃ ತಲ್ಲಣಕ್ಕೆ ಒಳಗಾಗಿದೆ. ರಾಜಧಾನಿ ಬೆಂಗಳೂರು ಮುಂದಿನ ದಿನಗಳಲ್ಲಿ ಚೆನ್ನ, ಮುಂಬೈ, ದಿಲ್ಲಿಯ ಹಾದಿಯನ್ನೇ ಹಿಡಿದುಬಿಡುತ್ತಾ ಅನ್ನೋ ಭೀತಿ ತೀವ್ರವಾಗುತ್ತಿದೆ.
ಸಮುದಾಯ ಹಂತಕ್ಕೆ ಪ್ರಸರಣ ಆಗಿಲ್ಲವೇ..?

ಬೆಂಗಳೂರಲ್ಲಿ ದಿನವೊಂದಕ್ಕೆ 700ಕ್ಕೂ ಹೆಚ್ಚು ಹೊಸ ಕೇಸ್‌ಗಳು ಪತ್ತೆಯಾಗುತ್ತಿವೆ. ಆದ್ರೆ, ಸಮುದಾಯ ಹಂತಕ್ಕೆ ಸೋಂಕು ಪ್ರಸರಣ ಆಗಿಲ್ಲ ಎಂದೇ ಸರ್ಕಾರ ಹೇಳುತ್ತಿದೆ. ಬೆಂಗಳೂರಿನ ಕೋವಿಡ್‌ ನಿಯಂತ್ರಣದ ಉಸ್ತುವಾರಿ ವಹಿಸಿಕೊಂಡಿರುವ ಹಿರಿಯ ಸಚಿವ ಆರ್‌. ಅಶೋಕ್‌ ಕೂಡಾ ಬೆಂಗಳೂರಿನಲ್ಲಿ ಕೊರೊನಾ ವೈರಸ್ ಸಮುದಾಯ ಹಂತಕ್ಕೆ ತಲುಪಿಲ್ಲ ಎಂದೇ ಹೇಳುತ್ತಿದ್ದಾರೆ. ಹಾಗಾದ್ರೆ 700ಕ್ಕೂ ಹೆಚ್ಚು ಕೇಸ್‌ಗಳು ದೃಢಪಡುತ್ತಿರೋದು ಎಲ್ಲಿಂದ..?

ರಾಜ್ಯ ಸರ್ಕಾರ ಪ್ರತಿ ದಿನ ಪ್ರಕಟಿಸುವ ಕೊರೊನಾ ವೈರಸ್‌ ಹೆಲ್ತ್‌ ಬುಲೆಟಿನ್‌ನಲ್ಲಿ ಈ ಮುನ್ನ ರೋಗಿಗಳ ಹಿನ್ನೆಲೆ ಬಗ್ಗೆ ಒಂದಿಷ್ಟು ಮಾಹಿತಿ ಇರುತ್ತಿತ್ತು. ಮಹಾರಾಷ್ಟ್ರದಿಂದ ಬಂದರೋ, ತಮಿಳುನಾಡಿನಿಂದ ಬಂದರೋ ಎಂದು ಗೊತ್ತಾಗುತ್ತಿತ್ತು. ಅಥವಾ ಒಂದು ವೇಳೆ ಹೊರಗಿನಿಂದ ಬಂದವರ ಸಂಪರ್ಕದಲ್ಲಿದ್ದವರು ಸೋಂಕಿಗೆ ತುತ್ತಾಗಿದ್ದಾರಾ ಅನ್ನೋದಾದ್ರೂ ಬಹಿರಂಗವಾಗುತ್ತಿತ್ತು. ಆದ್ರೆ, ಇದೀಗ ಆ ಮಾಹಿತಿ ಇಲ್ಲವಾದ ಕಾರಣ, ಸೋಂಕಿನ ಮೂಲ ಗೊತ್ತಾಗುತ್ತಿಲ್ಲ. ಇತ್ತ ಸರ್ಕಾರಕ್ಕೂ ಸಾವಿರ ಸಾವಿರ ಸಂಖ್ಯೆಯ ಸೋಂಕಿತರ ಮಾಹಿತಿಯನ್ನು ಪ್ರತಿದಿನ ಕ್ರೋಢೀಕರಿಸಿ ನೀಡೋದಕ್ಕೂ ಸಾಧ್ಯವಾಗುತ್ತಿಲ್ಲ. ಇಲ್ಲಿ ಅಧಿಕಾರಿಗಳು ಅನುಭವಿಸುತ್ತಿರುವ ಅತೀವ ಒತ್ತಡವನ್ನೂ ಮರೆಯುವಂತಿಲ್ಲ.
ಬೆಂಗಳೂರಲ್ಲಿ ಸಮರಕ್ಕೆ ಸಜ್ಜಾಗಲೇ ಬೇಕು ಸರ್ಕಾರ..!

ಹೌದು.. ಬೆಂಗಳೂರಿನಲ್ಲಿ ಈಗಾಗಲೇ ಕೊರೊನಾ ವೈರಸ್ ವಿರುದ್ಧದ ಹೋರಾಟಕ್ಕೆ ಸರ್ಕಾರ ಸಮರೋಪಾದಿ ಸಿದ್ದತೆ ಆರಂಭಿಸಿದೆ. ಆಂಬುಲೆನ್ಸ್‌ಗಳನ್ನು ಹತ್ತಾರು ಸಂಖ್ಯೆಯಲ್ಲಿ ಒಂದೆಡೆ ಸೇರಿಸಿ ಅಲ್ಲಿಂದಲೇ ಸುತ್ತಮುತ್ತಲ ಪ್ರದೇಶಗಳ ಕೊರೊನಾ ವೈರಸ್ ಸೋಂಕಿತರನ್ನು ತ್ವರಿತವಾಗಿ ಆಸ್ಪತ್ರೆಗೆ ಸೇರಿಸುವ ವ್ಯವಸ್ಥೆ ಮಾಡುತ್ತಿದೆ. ಕೊರೊನಾ ವೈರಸ್ ಪರೀಕ್ಷಾ ಪ್ರಮಾಣವೂ ಏರಿಕೆ ಕಂಡಿದೆ. ಕೊರೊನಾ ವೈರಸ್‌ ದೃಢಪಟ್ಟ ಕೂಡಲೇ ಸೋಂಕಿತರನ್ನು ಆಸ್ಪತ್ರೆಗೆ ಸೇರಿಸುವ ಕೆಲಸ ಇನ್ನಷ್ಟು ತೀವ್ರವಾಗಿ ಆಗಬೇಕಿದೆ. ಕೊರೊನಾ ವೈರಸ್‌ ಸೋಂಕಿತ ವ್ಯಕ್ತಿ ಆಸ್ಪತ್ರೆ ಸೇರಲು ಮೂರು ದಿನ ಕಾಯಬೇಕಾದ ಪರಿಸ್ಥಿತಿ ಇತ್ತು. ಇದೀಗ ಆ ಪ್ರಮಾಣ ಕಡಿಮೆಯಾಗಿದೆಯಾದರೂ, ಅತಿ ವೇಗವಾಗಿ ಸೋಂಕಿತನನ್ನು ಆಸ್ಪತ್ರೆಗೆ ಸೇರಿಸಲು ಸರ್ಕಾರ ಇನ್ನಷ್ಟು ಚುರುಕಿನ ಕ್ರಮಗಳಿಗೆ ಮೊರೆ ಹೋಗಬೇಕಿದೆ. ಆದಷ್ಟು ಬೇಗ ಸೋಂಕು ಪತ್ತೆ ಹಚ್ಚೋದು ಹಾಗೂ ಆದಷ್ಟು ಬೇಗ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಆರಂಭಿಸೋದೊಂದೇ ಈಗಿರುವ ದಾರಿ..

ಇತ್ತ ಖಾಸಗಿ ಆಸ್ಪತ್ರೆಗಳೂ ಶೇ. 50ರಷ್ಟು ಬೆಡ್‌ಗಳನ್ನು ಕೊರೊನಾ ಸೋಂಕಿತರಿಗಾಗಿ ಮೀಸಲಿಡಲು ತೀರ್ಮಾನಿಸಿದೆ. ಇನ್ನೊಂದೆಡೆ, ಕ್ವಾರಂಟೈನ್‌ನಲ್ಲಿ ಇರುವವರು ಬೇಜವಾಬ್ದಾರಿಯಾಗಿ ಅಲೆಯೋದನ್ನು ನಿಯಂತ್ರಿಸಲು ಕ್ರಮ ಕೈಗೊಳ್ಳಲಾಗಿದೆ. ಈ ಮೂಲಕ ಸೋಂಕು ಹರಡುವಿಕೆಗೆ ನಿಯಂತ್ರಣ ಹೇರಲು ಸರ್ಕಾರ ಸಜ್ಜಾಗಿದೆ. ಸದ್ಯದ ಮಟ್ಟಿಗೆ ಲಾಕ್‌ಡೌನ್‌ ಹೇರುವಂಥಾ ಸ್ಥಿತಿಯಲ್ಲಿ ಸರ್ಕಾರವೂ ಇಲ್ಲ, ಅದನ್ನು ತಡೆದುಕೊಳ್ಳುವಷ್ಟು ಆರ್ಥಿಕ ಚೈತನ್ಯ ಜನರಲ್ಲೂ ಇದ್ದಂತೆ ಕಂಡು ಬರುತ್ತಿಲ್ಲ. ಹಾಗಾದ್ರೆ, ‘ಪ್ಲಾನ್‌ ಬಿ’ ಏನು..?
ಸಾಮಾನ್ಯ ಜನರಾದ ನಾವೇನು ಮಾಡಬೇಕು..?

ಬೆಂಗಳೂರಿನ ಪಾರ್ಕ್ ಒಂದರಲ್ಲಿ ಜನರು ಸಾಮಾಜಿಕ ಅಂತರ ಗಾಳಿಗೆ ತೂರಿ, ಮಾಸ್ಕ್‌ ಹಾಕದೆ ಅಡ್ಡಾಡುತ್ತಿದ್ದ ಪ್ರಕರಣ ಬೆಳಕಿಗೆ ಬಂತು. ಇನ್ನೊಂದೆಡೆ, ಬೆಂಗಳೂರಿನಾದ್ಯಂತ ಹರಡಿಕೊಂಡಿರುವ ಬಿಬಿಎಂಪಿ ಮಾರ್ಷಲ್‌ಗಳು ನಗರದಲ್ಲಿ ಮಾಸ್ಕ್ ಧರಿಸದೆ ಅಡ್ಡಾಡುವ ನೂರಾರು ಮಂದಿಗೆ ದಂಡದ ಬರೆ ಎಳೆದಿದ್ದಾರೆ. ನಾವೇಕೆ ಹೀಗೆ..? ಕೊರೊನಾ ವೈರಸ್‌ ನಮಗಿಂತಾ ತುಂಬಾ ದೂರದಲ್ಲಿದೆ ಎಂಬ ಭ್ರಮೆ ಏಕೆ..? ಈ ಭ್ರಮಾಲೋಕದಿಂದ ಸಾಮಾನ್ಯ ಜನರಾದ ನಾವು ಹೊರಗೆ ಬರಬೇಕಿದೆ. ಸರ್ಕಾರ ಏನು ಮಾಡ್ತಿದೆ ಎಂದು ಪ್ರಶ್ನಿಸುವ ಮುನ್ನ ನಾವು ಅತ್ಯಗತ್ಯ ಸಂದರ್ಭವಲ್ಲದೆ ಸುಖಾಸುಮ್ಮನೆ ಮನೆಯಿಂದ ಹೊರಗೆ ಬರಬಾರದೆಂಬ ನಿಯಮ ಪಾಲಿಸಬೇಕಿದೆ. ಇದು ಒಂದು ದಿನದ ಹೋರಾಟವಲ್ಲ.. 2020ರ ಅಂತ್ಯದವರೆಗೂ ನಡೆಸಬೇಕಾದ ನಿರಂತರ ಸಮರ..!

Related posts

ರಾಜಕೀಯ ನಿವೃತ್ತಿ ತೆಗೆದುಕೊಳ್ಳಲಿದ್ದಾರಾ ಸಿದ್ದರಾಮಯ್ಯ?

Times fo Deenabandhu

  ಒಂದೇ ದಿನ 515 ಪಾಸಿಟಿವ್‌‌, ಉಡುಪಿಯಲ್ಲೇ 204

ಒಮ್ಮೆಗೇ ಇಲ್ಲ ಶ್ರೀಮನ್ನಾರಾಯಣ ಅವತಾರ: ಡಿ. 27ಕ್ಕೆ ಕನ್ನಡದಲ್ಲಷ್ಟೇ ಬಿಡುಗಡೆ

Times fo Deenabandhu