Times of Deenabandhu
  • Home
  • ಮುಖ್ಯಾಂಶಗಳು
  • ಇನ್‌ಸ್ಟಿಟ್ಯೂಷನಲ್‌ ಕ್ವಾರಂಟೈನ್‌ 14 ದಿನಗಳಿಂದ 7ಕ್ಕೆ ಇಳಿಕೆ, ಮತ್ತಷ್ಟು ಅನಾಹುತಕ್ಕೆ ದಾರಿ
ಪ್ರಧಾನ ಸುದ್ದಿ ಮುಖ್ಯಾಂಶಗಳು

ಇನ್‌ಸ್ಟಿಟ್ಯೂಷನಲ್‌ ಕ್ವಾರಂಟೈನ್‌ 14 ದಿನಗಳಿಂದ 7ಕ್ಕೆ ಇಳಿಕೆ, ಮತ್ತಷ್ಟು ಅನಾಹುತಕ್ಕೆ ದಾರಿ

ಬೆಂಗಳೂರು: ಹೊರರಾಜ್ಯಗಳಿಂದ ಬರುತ್ತಿರುವವರಿಂದ ರಾಜ್ಯದಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಏರುತ್ತಲೇ ಇದೆ. ಇದೇ ಸಮಯದಲ್ಲಿ ಹೈರಿಸ್ಕ್‌ ರಾಜ್ಯಗಳಿಂದ ಬರುವವರಿಗೆ ಇನ್‌ಸ್ಟಿಟ್ಯೂಷನಲ್‌ ಕ್ವಾರಂಟೈನ್‌ ಅವಧಿಯನ್ನು 14 ರ ಬದಲು 7 ದಿನಕ್ಕೆ ಇಳಿಸಲಾಗಿದೆ. ಜತೆಗೆ ಹೈರಿಸ್ಕ್‌ ಇಲ್ಲದ ರಾಜ್ಯಗಳಿಂದ ಬಂದವರಿಗೆ 14 ದಿನಗಳ ಮನೆ ಕ್ವಾರಂಟೈನ್‌ ಮಾತ್ರ ಸೂಚಿಸಲಾಗಿದೆ.
ಮಹಾರಾಷ್ಟ್ರ, ದಿಲ್ಲಿ, ತಮಿಳುನಾಡು ಮೊದಲಾದ ರಾಜ್ಯಗಳಿಂದ ಬರುವವರನ್ನು 14 ದಿನಗಳ ಕಾಲ ಇನ್‌ಸ್ಟಿಟ್ಯೂಷನ್‌ ಕ್ವಾರಂಟೈನ್‌ ಗೆ (ವಸತಿಗೃಹ, ಹೋಟೆಲ್‌) ಒಳಪಡಿಸಲಾಗುತ್ತಿತ್ತು. ನಂತರವೂ ಸೋಂಕು ಪತ್ತೆಯಾಗದಿದ್ದರೆ ಮನೆಯಲ್ಲಿ 14 ಕ್ವಾರಂಟೈನ್‌ ಒಟ್ಟು 28 ದಿನಗಳವರೆಗೆ ಅವರು ಕ್ವಾರಂಟೈನ್‌ನಲ್ಲಿ ಇರಬೇಕಾಗುತ್ತಿತ್ತು. ಆದರೆ ಈಗ ನಿಯಮ ಬದಲಿಸಿದ್ದು, 7 ದಿನ ಇನ್‌ಸ್ಟಿಟ್ಯೂಷನಲ್‌ ಹಾಗೂ ನಂತರ 7 ದಿನ ಮನೆ ಕ್ವಾರಂಟೈನ್‌ ಮಾಡಬೇಕೆಂದು ಸೂಚನೆ ನೀಡಲಾಗಿದೆ.

ಏ. 24 ರಿಂದ ಸೇವಾ ಸಿಂಧು ವೆಬ್‌ಸೈಟ್‌ನಲ್ಲಿ ಹೆಸರು ನೋಂದಾಯಿಸಿಕೊಂಡು ಮಹಾರಾಷ್ಟ್ರದಿಂದ ರಾಜ್ಯಕ್ಕೆ ಆಗಮಿಸಿದವರಲ್ಲಿ 526 ಮಂದಿ ಸೋಂಕಿತರಾಗಿದ್ದಾರೆ. ಮಂಡ್ಯದ ಸೋಂಕಿತರ ಪೈಕಿ 176 ಮಂದಿ ಮಹಾರಾಷ್ಟ್ರದಿಂದ ಬಂದವರೇ ಆಗಿದ್ದಾರೆ. ಮೇ 22 ರಂದು ವರದಿಯಾದ ಪ್ರಕರಣಗಳ ಪೈಕಿ 111 ಮಂದಿ ಮಹಾರಾಷ್ಟ್ರದಿಂದ ಬಂದವರಾಗಿದ್ದಾರೆ. ಇನ್ನೂ ಹಲವರು ತೆಲಂಗಾಣ, ತಮಿಳುನಾಡು, ಕೇರಳದಿಂದ ಬಂದಿದ್ದಾರೆ. ಪರಿಸ್ಥಿತಿ ಹೀಗಿರುವಾಗ ನಿಯಮದಲ್ಲಿ ತಂದ ಬದಲಾವಣೆ ಮತ್ತಷ್ಟು ಅನಾಹುತಕ್ಕೆ ದಾರಿ ಮಾಡಕೊಡಲಿದೆ.
‘ಎಸ್‌‍ಒಪಿ’ಯಲ್ಲಿ ಬದಲಾವಣೆ

ಆರೋಗ್ಯ ಇಲಾಖೆಯು ಮೇ 22 ರಂದು ಜಾರಿ ಮಾಡಿದ ಸ್ಟಾಂಡರ್ಡ್‌ ಆಪರೇಟಿಂಗ್‌ ಪ್ರೊಸಿಜರ್‌ನಲ್ಲಿ ಕ್ವಾರಂಟೈನ್‌ ಅವಧಿಗೆ ಸಂಬಂಧಿಸಿದಂತೆ ಬದಲಾವಣೆ ತಂದಿದೆ. ರಾಜ್ಯ ಸರಕಾರ ಗುರುತಿಸಿದ ಪ್ರಮುಖ ಸೋಂಕಿತ ರಾಜ್ಯಗಳಿಂದ ಬರುವವರನ್ನು 7 ದಿನಗಳವರೆಗೆ ಇನ್‌ಸ್ಟಿಟ್ಯೂಷನಲ್‌ ಕ್ವಾರಂಟೈನ್‌ನಲ್ಲಿಡಬೇಕು. ನಂತರ ಅವರ ದ್ರವದ ಮಾದರಿ ಪರೀಕ್ಷಿಸಿ ನೆಗೆಟಿವ್‌ ಬಂದರೆ ಮನೆಗೆ ಕಳುಹಿಸಿ 7 ದಿನಗಳ ಕ್ವಾರಂಟೈನ್‌ ನಲ್ಲಿಇಡಬೇಕು ಎಂದು ಈ ಎಸ್‌‍ಒಪಿಯಲ್ಲಿ ತಿಳಿಸಲಾಗಿದೆ.

ಹೈರಿಸ್ಕ್‌ ರಾಜ್ಯಗಳು

ಮಹಾರಾಷ್ಟ್ರ, ತಮಿಳುನಾಡು, ದಿಲ್ಲಿ, ರಾಜಸ್ಥಾನ, ಮಧ್ಯಪ್ರದೇಶ, ಗುಜರಾತ್‌.

ಕೆಲ ವರ್ಗಕ್ಕೆ ವಿನಾಯಿತಿ

ಗರ್ಭಿಣಿಯರು, 10 ವರ್ಷದೊಳಗಿನ ಮಕ್ಕಳು ಹಾಗೂ 80 ವರ್ಷ ಮೇಲ್ಪಟ್ಟವರಿಗೆ ಸೋಂಕಿನ ಲಕ್ಷಣವಿಲ್ಲದಿದ್ದರೆ ಮನೆಯಲ್ಲೇ 14 ದಿನಗಳ ಕ್ವಾರಂಟೈನ್‌ಗೆ ಒಳಗಾಗಲು ಸೂಚಿಸಲಾಗುತ್ತಿದೆ. ಈ ವರ್ಗದವರನ್ನು ಕಡ್ಡಾಯವಾಗಿ ಇನ್‌ಸ್ಟಿಟ್ಯೂಶನಲ್‌ ಕ್ವಾರಂಟೈನ್‌ ಗೆ ಒಳಪಡಿಸುತ್ತಿಲ್ಲ.

ಇನ್‌ಸ್ಟಿಟ್ಯೂಷನ್‌ ಕೊರತೆ

ಕೆಲ ಜಿಲ್ಲೆಗಳಲ್ಲಿ ವಸತಿಗೃಹ, ಹೋಟೆಲ್‌ಗಳ ಕೊರತೆ ಇದೆ. ಹೊರ ರಾಜ್ಯಗಳಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಬರುತ್ತಿರುವುದರಿಂದ ಕ್ವಾರಂಟೈನ್‌ ನಲ್ಲಿರುವುದು ಕಷ್ಟವಾಗಿದೆ.

Related posts

ಕೊರೊನಾ ವೈರಸ್ ಸೋಂಕಿನಿಂದ ಗುಣಮುಖರಾಗಿದ್ದರೂ ಬಿಡದ ಜವರಾಯ..!

ಎಲ್ಲಾ ಅಪಾಯ ಎದುರಿಸಿ ನಿಲ್ಲುವುದು ಭಾರತದ ಗುಣ :ಮನ್ ಕಿ ಬಾತ್‌ನಲ್ಲಿ ಪ್ರಧಾನಿ ಮೋದಿ ವಿಶ್ವಾಸ!

ರಾಜ್ಯದಲ್ಲಿ ಮತ್ತೊಮ್ಮೆ ಕೊರೊನಾ ಡಬಲ್‌ ಸೆಂಚುರಿ..!