Times of Deenabandhu
  • Home
  • ಮುಖ್ಯಾಂಶಗಳು
  • ‘ಒಂದಲ್ಲ ಒಂದು ದಿನ ಟ್ರೋಫಿ ನಿಮ್ಮದೆ’: ಟೀಮ್‌ ಇಂಡಿಯಾ ಬೆನ್ನು ತಟ್ಟಿದ ಮಾಜಿ ಕ್ರಿಕೆಟಿಗರು
ಕ್ರೀಡೆ ಮುಖ್ಯಾಂಶಗಳು

‘ಒಂದಲ್ಲ ಒಂದು ದಿನ ಟ್ರೋಫಿ ನಿಮ್ಮದೆ’: ಟೀಮ್‌ ಇಂಡಿಯಾ ಬೆನ್ನು ತಟ್ಟಿದ ಮಾಜಿ ಕ್ರಿಕೆಟಿಗರು

ಹೊಸದಿಲ್ಲಿ: ಐಸಿಸಿ ಮಹಿಳಾ ಟಿ20 ವಿಶ್ವಕಪ್‌ ಟೂರ್ನಿಯ ಲೀಗ್‌ ಹಂತದಲ್ಲಿ ಅಬ್ಬರಿಸಿ ಅಜೇಯವಾಗಿ ನಾಕ್‌ಔಟ್‌ ಹಂತಕ್ಕೆ ಕಾಲಿಟ್ಟಿದ್ದ ಭಾರತ ತಂಡ ಫೈನಲ್‌ನಲ್ಲಿ ಅಷ್ಟೇ ನಿರಾಶಾದಾಯಕ ಅಂತ್ಯ ಕಂಡಿತು. ಬ್ಯಾಟಿಂಗ್‌, ಬೌಲಿಂಗ್‌ ಮತ್ತು ಫೀಲ್ಡಿಂಗ್‌ ಎಲ್ಲದರಲ್ಲೂ ಮುಗ್ಗರಿಸಿ 85 ರನ್‌ಗಳ ಅಂತರದಲ್ಲಿ ಆತಿಥೇಯ ಆಸ್ಟ್ರೇಲಿಯಾ ಎದುರು ಹೀನಾಯ ಸೋಲುಂಡಿತು.
ಎಂಸಿಜಿ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಫೈನಲ್‌ ಪಂದ್ಯದಲ್ಲಿ ಟಾಸ್‌ ಗೆದ್ದು ಮೊದಲು ಬ್ಯಾಟ್‌ ಮಾಡಿದ ಆಸ್ಟ್ರೇಲಿಯಾ 184/4 ರನ್‌ಗಳ ಬೃಹತ್‌ ಮೊತ್ತ ದಾಖಲಿಸಿತು. ಗುರಿ ಬೆನ್ನತ್ತಿದ ಭಾರತ ತಂಡ 99ಕ್ಕೆ ಆಲ್‌ಔಟ್‌ ಆಗುವ ಮೂಲಕ ಸೋಲಿನ ಕಡಲಲ್ಲಿ ಮುಳುಗಿದರೆ, ಆಸ್ಟ್ರೇಲಿಯಾ ತವರಿನಂಗಣದಲ್ಲಿ ತನ್ನ ಮೊದಲ ಹಾಗೂ ಟಿ20 ವಿಶ್ವಕಪ್‌ ಇತಿಹಾಸದಲ್ಲಿ ಐದನೇ ಪ್ರಶಸ್ತಿ ಗೆದ್ದು ಬೀಗಿತು.

ಆದರೆ, ಟೂರ್ನಿಯಲ್ಲಿ ಭಾರತ ತಂಡ ನೀಡಿದ ಪ್ರದರ್ಶನ ನಿಜಕ್ಕೂ ಪ್ರಶಂಸಾರ್ಹ. ಹೀಗಾಗಿ ಫೈನಲ್‌ನಲ್ಲಿ ಸೋತು ಕಣ್ಣೀರಿಟ್ಟ ಟೀಮ್‌ ಇಂಡಿಯಾ ಆಟಗಾರ್ತಿಯರಿಗೆ ಹಾಲಿ ಮಾಜಿ ಕ್ರಿಕೆಟಿಗರೆಲ್ಲಾ ಸೇರಿ ಬೆನ್ನು ತಟ್ಟಿದ್ದಾರೆ. ದಿಗ್ಗಜರಾದ ವಿವಿಎಸ್‌ ಲಕ್ಷ್ಮಣ್‌ ಹಾಗೂ ವೆಸ್ಟ್‌ ಇಂಡೀಸ್‌ ತಂಡದ ಮಾಜಿ ನಾಯಕ ಸರ್‌ ವಿವಿಯನ್‌ ರಿಚರ್ಡ್ಸ್‌ ಟೀಮ್‌ ಇಂಡಿಯಾವನ್ನು ಹುರಿದುಂಬಿಸಿದ್ದಾರೆ.
“ಎಂದಿಗೂ ತಲೆ ತಗ್ಗಿಸಬೇಡಿ. ಟೂರ್ನಿಯುದ್ದಕ್ಕೂ ನಿಮ್ಮ ಪ್ರದರ್ಶನ ಅದ್ಭುತವಾಗಿತ್ತು. ಒಂದಲ್ಲಾ ಒಂದು ದಿನ ಟ್ರೋಫಿ ನಿಮ್ಮದೆ. ವಿಶ್ವಾಸ ಕಾಯ್ದುಕೊಳ್ಳಿ,” ಎಂದು ಟ್ವೀಟ್‌ ಮಾಡುವ ಮೂಲಕ ವಿವಿಯನ್‌ ರಿಚರ್ಡ್ಸ್‌ ಭಾರತ ತಂಡ ಆತ್ಮವಿಶ್ವಾಸ ಹೆಚ್ಚಿಸುವ ಮಾತುಗಳನ್ನಾಡಿದ್ದಾರೆ.

ಇದೇ ವೇಳೆ ಲಕ್ಷ್ಮಣ್‌ ಕೂಡ ಟ್ವೀಟ್‌ ಮಾಡಿದ್ದು, “ವಿಶ್ವಕಪ್‌ ಗೆದ್ದ ಆಸ್ಟ್ರೇಲಿಯಾದ ತಂಡಕ್ಕೆ ಶುಭಾಶಯಗಳು. ಇನ್ನು ಭಾರತ ತಂಡದ ಸಾಧನೆ ಬಗ್ಗೆ ನಮಗೆ ಹೆಮ್ಮೆಯಿದೆ. ಟೂರ್ನಿಯಲ್ಲಿ ನೀವು ನೀಡಿದ ಪ್ರದರ್ಶನವನ್ನು ಆನಂದಿಸಿದ್ದೇವೆ. ಭವಿಷ್ಯದ ಪಂದ್ಯಗಳಿಗೆ ಶುಭವಾಗಲಿ,” ಎಂದು ಲಕ್ಷ್ಮಣ್‌ ಟ್ವೀಟ್‌ ಮಾಡಿದ್ದಾರೆ.
“ಮಹಿಳಾ ಟಿ20 ವಿಶ್ವಕಪ್ ಪಂದ್ಯವನ್ನು ಲಕ್ಷಾಂತರ ಮಂದಿ ವೀಕ್ಷಿಸುತ್ತಾರೆಂದು ಕೆಲ ವರ್ಷಗಳ ಹಿಂದೆ ಯಾರೊಬ್ಬರೂ ಅಂದಾಜಿಸಿರಲಿಲ್ಲ. ಕಪ್‌ ಬರುತ್ತವೇ ಹೋಗುತ್ತವೆ. ಆದರೆ ಇಂದು ಎಲ್ಲ ಕಟ್ಟುಪಾಡುಗಳನ್ನು ಮೆಟ್ಟಿನಿಂತು ಸಾಧನೆಯತ್ತ ಹೆಜ್ಜೆಯಾಕುತ್ತಿರುವ ಪ್ರತಿಯೊಬ್ಬ ಭಾರತೀಯ ಹೆಣ್ಣುಮಕ್ಕಳಿಗೆ ಸಿಕ್ಕ ಗೆಲುವಾಗಿದೆ. ಅಂದಹಾಗೆ ಆಸ್ಟ್ರೇಲಿಯಾ ತಂಡಕ್ಕೆ ಶುಭಾಶಯಗಳು,” ಎಂದು ಭಾರತ ತಂಡದ ಮಾಜಿ ಆರಂಭಿಕ ಬ್ಯಾಟ್ಸ್‌ಮನ್‌ ಗೌತಮ್‌ ಗಂಭೀರ್‌ ಟ್ವಿಟರ್‌ ಮೂಲಕ ವಿಶೇಷ ಸಂದೇಶ ರವಾನಿಸಿದ್ದಾರೆ.
“ವಿಶ್ವಕಪ್‌ ಗೆಲುವಿನ ಸನಿಹಕ್ಕೆ ಕಾಲಿಟ್ಟು ನಿರಾಸೆ ಅನುಭವಿಸಿದ ವೇಳೆ ಎಷ್ಟು ಬೇಸರವಾಗುತ್ತದೆ ಎಂಬುದು ನನಗೆ ಚೆನ್ನಾಗಿ ತಿಳಿದಿದೆ. ಹೆಣ್ಣುಮಕ್ಕಳೆ ನೀವು ತಲೆಯೆತ್ತಿ. ಫಲಿತಾಂಶ ಏನೇ ಆಗಿರಲಿ ಒಂದು ತಲೆಮಾರಿಗೆ ನೀವು ಸ್ಫೂರ್ತಿಯಾಗಿದ್ದೀರಿ. ಎಲ್ಲರೂ ಹೆಮ್ಮೆ ಪಡುವಂತಹ ಟೂರ್ನಿಯನ್ನಾಡಿದ್ದೀರಿ. ಆಸ್ಟ್ರೇಲಿಯಾ ತಂಡ ಗೆಲುವಿಗೆ ಅರ್ಹವಾಗಿತ್ತು,” ಎಂದು ಭಾರತ ತಂಡದ ಮಾಜಿ ಆಟಗಾರ ಮೊಹಮ್ಮದ್‌ ಕೈಫ್‌ ಕೂಡ ಟ್ವೀಟ್‌ ಮಾಡಿದ್ದಾರೆ. ಮೊಹಮ್ಮದ್‌ ಕೈಫ್‌, 2003ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ವಿಶ್ವಕಪ್‌ ಫೈನಲ್‌ನಲ್ಲಿ ಸೋತ ಭಾರತ ಪುರುಷರ ತಂಡದ ಸದಸ್ಯರಾಗಿದ್ದರು.ಐಸಿಸಿ ಮಹಿಳಾ ಟಿ20 ವಿಶ್ವಕಪ್‌ ಫೈನಲ್‌ ಪಂದ್ಯದ ಹೈಲೈಟ್ಸ್‌ ಇಲ್ಲಿ ವೀಕ್ಷಿಸಬಹುದಾಗಿದೆ.

Related posts

ಸರಕಾರ ಮತ್ತು ತೆರಿಗೆದಾರರ ಮಧ್ಯೆ ‘ಸ್ವೀಟ್‌ ಡೀಲ್‌’

Times fo Deenabandhu

ಒಮ್ಮೆಗೇ ಇಲ್ಲ ಶ್ರೀಮನ್ನಾರಾಯಣ ಅವತಾರ: ಡಿ. 27ಕ್ಕೆ ಕನ್ನಡದಲ್ಲಷ್ಟೇ ಬಿಡುಗಡೆ

Times fo Deenabandhu

ಪಾಕ್‌ ಪತ್ರಿಕೆಯಲ್ಲಿ ಸುದ್ದಿಯಾಯ್ತು ಬೆಂಗಳೂರಿನಲ್ಲಿ ಅಮೂಲ್ಯ ಕೂಗಿದ ಘೋಷಣೆ

Times fo Deenabandhu