Times of Deenabandhu
  • Home
  • ಪ್ರಧಾನ ಸುದ್ದಿ
  • ಕುಟುಂಬ ರಾಜಕಾರಣದ ವಿಸ್ತರಣೆಗೆ ಗೌಡರ ಮಾಸ್ಟರ್‌ ಪ್ಲಾನ್‌, 2023ಕ್ಕೆ ಅರ್ಧ ಡಜನ್‌ ಸ್ಪರ್ಧಿಗಳು ರೆಡಿ!
ಪ್ರಧಾನ ಸುದ್ದಿ ಮುಖ್ಯಾಂಶಗಳು ರಾಜಕೀಯ ರಾಜ್ಯ

ಕುಟುಂಬ ರಾಜಕಾರಣದ ವಿಸ್ತರಣೆಗೆ ಗೌಡರ ಮಾಸ್ಟರ್‌ ಪ್ಲಾನ್‌, 2023ಕ್ಕೆ ಅರ್ಧ ಡಜನ್‌ ಸ್ಪರ್ಧಿಗಳು ರೆಡಿ!

ಬೆಂಗಳೂರು: ರಾಜ್ಯದಲ್ಲಿ ಪಕ್ಷದ ನೆಲೆ ಉಳಿಸಿಕೊಳ್ಳಲು ಜೆಡಿಎಸ್‌ ನಾಯಕತ್ವ ತಲೆಕೆಡಿಸಿಕೊಂಡಿದ್ದು, ರಾಷ್ಟ್ರ ರಾಜಕಾರಣದ ಆಸೆ ತೊರೆದು ಪ್ರಾದೇಶಿಕ ಶಕ್ತಿಯಾಗಿ ಅಸ್ತಿತ್ವ ಗಟ್ಟಿಮಾಡಿಕೊಳ್ಳಲು ದೇವೇಗೌಡರ ಕುಟುಂಬ ಮಾಸ್ಟರ್‌ ಪ್ಲಾನ್‌ ರೂಪಿಸಿದೆ. ಪಕ್ಷದ ಚಿನ್ಹೆಯಡಿ ಗೆದ್ದ ಬಹಳಷ್ಟು ಮಂದಿ ರಾಷ್ಟ್ರೀಯ ಪಕ್ಷಗಳತ್ತ ವಲಸೆ ಹೋಗುವ ಪರಂಪರೆ ಮುಂದುವರಿದಿರುವ ಸ್ಥಿತಿಯಲ್ಲಿ ಕುಟುಂಬ ರಾಜಕಾರಣದ ವಿಸ್ತರಣೆಗೇ ಗೌಡರ ಕುಟುಂಬದ ಒಲವು ವ್ಯಕ್ತವಾಗಿದೆ. 2023ರ ವಿಧಾನಸಭೆ ಚುನಾವಣೆ ದೃಷ್ಟಿಯಲ್ಲಿಟ್ಟುಕೊಂಡು ರಾಜ್ಯ ರಾಜಕಾರಣದಲ್ಲಿ ‘ನಿರ್ಣಾಯಕ ಪಾತ್ರ’ದ ಅವಕಾಶ ಗಟ್ಟಿ ಮಾಡಿಕೊಳ್ಳಲು ನಾನಾ ಲೆಕ್ಕಾಚಾರಗಳು ನಡೆದಿವೆ. ಸದ್ಯದ ಲೆಕ್ಕಾಚಾರದಂತೆ ಮುಂದಿನ ಚುನಾವಣೆಗೆ ಜೆಡಿಎಸ್‌ ಅಭ್ಯರ್ಥಿಗಳ ಪಟ್ಟಿಯಲ್ಲಿ ದೇವೇಗೌಡರ ಕುಟುಂಬದವರು ಸಂಖ್ಯೆ ಅರ್ಧ ಡಜನ್‌ ತಲುಪುತ್ತದೆ ಎನ್ನಲಾಗಿದೆ.
ಎಚ್‌.ಡಿ. ರೇವಣ್ಣ ಹೊಳೆನರಸೀಪುರದಲ್ಲಿ ಮುಂದುವರಿಯಲಿದ್ದು, ಸದ್ಯ ಹಾಸನ ಜಿ.ಪಂ. ಸದಸ್ಯರಾಗಿರುವ ಅವರ ಪತ್ನಿ ಭವಾನಿ ರೇವಣ್ಣ ಕೆ.ಆರ್‌. ನಗರ ವಿಧಾನಸಭಾ ಕ್ಷೇತ್ರದ ಅಭ್ಯರ್ಥಿ ಆಗಬಹುದು. ದೇವೇಗೌಡರ ತವರು ಜಿಲ್ಲೆ ಹಾಸನ ಕೇಂದ್ರ ಸ್ಥಾನಕ್ಕೆ ಬಿಜೆಪಿ ಲಗ್ಗೆ ಇಟ್ಟಿರುವ ಹಿನ್ನೆಲೆಯಲ್ಲಿ ಹಾಸನ ಸಿಟಿಯಲ್ಲಿ ರೇವಣ್ಣ ಪುತ್ರ ಡಾ. ಸೂರಜ್‌ ಅವರನ್ನು ಕಣಕ್ಕಿಳಿಸುವ ಸಾಧ್ಯತೆ ಇದೆ. ಇವರೆಲ್ಲರ ಜೊತೆಗೆ ಹಾಸನ ಸಂಸದರಾಗಿ ಪ್ರಜ್ವಲ್‌ ರೇವಣ್ಣ ಮುಂದುವರಿಯಲಿದ್ದಾರೆ.
ಅನಿತಾ ಕುಮಾರಸ್ವಾಮಿ ಚನ್ನಪಟ್ಟಣದಲ್ಲಿ ಮುಂದುವರಿಯಲಿದ್ದು, ನಿಖಿಲ್‌ ಕುಮಾರಸ್ವಾಮಿ ರಾಮನಗರದಲ್ಲಿ ಎಚ್‌ಡಿ ಕುಮಾರಸ್ವಾಮಿಗೆ ಉತ್ತರಾಧಿಕಾರಿ ಆಗಲಿದ್ದಾರೆ. ಕುಮಾರಸ್ವಾಮಿ ಪಕ್ಕದ ಮಾಗಡಿ ಕ್ಷೇತ್ರದಿಂದ ಸ್ಪರ್ಧೆಗೆ ಅಣಿಯಾಗಲಿದ್ದಾರೆ. ಮುಂದಿನ ಚುನಾವಣೆಯಲ್ಲಿ ದೇವೇಗೌಡರ ಕುಟುಂಬದ ಈ 6 ಮಂದಿ ಅಭ್ಯರ್ಥಿಗಳಾಗುವುದು ನಿಶ್ಚಿತ ಎಂಬ ಮಾತುಗಳು ಜೆಡಿಎಸ್‌ ಶಾಸಕರ ಗುಂಪಿನಲ್ಲೇ ಹರಿದಾಡುತ್ತಿವೆ. ಕೆ.ಆರ್‌. ಪೇಟೆ ಕ್ಷೇತ್ರದ ಉಪಚುನಾವಣೆಯಲ್ಲಿ ಕೆಲಸ ಮಾಡಿ ತರಬೇತಿ ಪಡೆದಿರುವ ಡಾ. ಸೂರಜ್‌, ಹಾಸನ ವಿಧಾನಸಭಾ ಕ್ಷೇತ್ರದಲ್ಲಿ ಕ್ರಿಯಾಶೀಲರಾಗಿದ್ದಾರೆ.
ಚೊಚ್ಚಲ ಪ್ರಯತ್ನದಲ್ಲೇ ಪುತ್ರ ನಿಖಿಲ್‌ ಲೋಕಸಭೆಗೆ ಪ್ರವೇಶಿಸಬೇಕು ಎಂದು ಕನಸು ಕಂಡು ಮಂಡ್ಯದಿಂದ ಕಣಕ್ಕಿಳಿಸಿದ್ದ ಕುಮಾರಸ್ವಾಮಿ ಅವರಿಗೆ ನಿರಾಸೆಯಾಗಿದೆ. ಮಂಡ್ಯದಲ್ಲಿ ಕಳೆದುಕೊಂಡಿದ್ದನ್ನು ರಾಮನಗರದಲ್ಲಿ ಪಡೆದುಕೊಳ್ಳಲು ಅವರು ಬಯಸಿದ್ದಾರೆ. ಕುಮಾರಸ್ವಾಮಿ ಅವರು ಸಿಎಂ ಆಗಿದ್ದುಕೊಂಡೇ ಎಲ್ಲಾ ಪ್ರಯತ್ನ ನಡೆಸಿದರೂ ಮಂಡ್ಯದ ಜನ ಮಣೆ ಹಾಕದ ಕಾರಣ, ಪುತ್ರನ ರಾಜಕೀಯ ಭವಿಷ್ಯಕ್ಕೆ ಮಂಡ್ಯದ ಆಸೆಯನ್ನು ಕೈಬಿಟ್ಟಿದ್ದಾರೆ.
ತಮ್ಮ ಕುಟುಂಬಕ್ಕೆ ರಾಜಕೀಯ ಮರುಜನ್ಮ ನೀಡುತ್ತಲೇ ಬಂದಿರುವ ರಾಮನಗರವೇ ‘ಪುತ್ರ ಪಟ್ಟಾಭಿಷೇಕ’ಕ್ಕೆ ಸೂಕ್ತ ಎಂಬ ತೀರ್ಮಾನಕ್ಕೆ ಎಚ್‌ಡಿಕೆ ಬಂದಿದ್ದಾರೆ ಎನ್ನಲಾಗಿದೆ.

ರಾಜಧಾನಿ ಬೆಂಗಳೂರಿನಲ್ಲಿ ವೈಭವದ ಮದುವೆಗೆ ಎಲ್ಲಾ ಅವಕಾಶ ಇದ್ದರೂ ನಿಖಿಲ್‌ ಕುಮಾರಸ್ವಾಮಿ ಮದುವೆಯನ್ನು ರಾಮನಗರದಲ್ಲೇ ಕೈಗೊಂಡಿರುವುದಕ್ಕೂ ಈ ರಾಜಕೀಯ ಲೆಕ್ಕಾಚಾರವೇ ಕಾರಣ. ಪುತ್ರನ ರಾಜಕೀಯ ಭವಿಷ್ಯಕ್ಕೆ ಸುರಕ್ಷಿತ ವೇದಿಕೆ ಅಣಿಗೊಳಿಸುವ ಉದ್ದೇಶಕ್ಕಾಗಿಯೇ ರಾಮನಗರ -ಚನ್ನಪಟ್ಟಣ ಮಧ್ಯೆ ನಿಖಿಲ್‌ ಮದುವೆ ಮಂಟಪ ಅಣಿಯಾಗುತ್ತಿದೆ.
‘‘ನಿಖಿಲ್‌ ರಾಜಕೀಯ ಜೀವನ ದೈವದ ಆಟ. ಜನರ ಒತ್ತಾಯಕ್ಕೆ ಮಣಿಯಬೇಕಿದ್ದು, ರಾಮನಗರಕ್ಕೆ ನಿಖಿಲ್‌ ಬರುತ್ತಾನೆ. ಮಂಡ್ಯಕ್ಕೆ ಹೋಗಿದ್ದು ಆಕಸ್ಮಿಕ. ನಮ್ಮ ವಂಶಕ್ಕೆ ಶಕ್ತಿ ಕೊಟ್ಟಿರುವುದು ರಾಮನಗರ. ನಿಖಿಲ್‌ ಕೂಡ ಇಲ್ಲೇ ಬೆಳೆಯಬೇಕು,’’ ಎಂದು ದೇವೇಗೌಡರು ಮೂರು ದಿನಗಳ ಹಿಂದೆ ನೇರವಾಗಿಯೇ ಹೇಳಿದ್ದಾರೆ. ಈ ಮೂಲಕ ಈ ಸಂಬಂಧ ಕೇಳಿಬರುತ್ತಿದ್ದ ಗುಸುಗುಸು ಚರ್ಚೆಯನ್ನು ದೃಢೀಕರಿಸಿದ್ದಾರೆ.

‘‘ದೇವೇಗೌಡರ ಕುಟುಂಬಕ್ಕೆ ರಾಜಕೀಯ ಮರುಜನ್ಮ ನೀಡಿದ ಜನರ ಮಧ್ಯೆ ನನ್ನ ಮಗನ ಮದುವೆ ನಡೆಯುತ್ತಿದೆ,’’ ಎಂದು ಕುಮಾರಸ್ವಾಮಿ ಅವರೂ ರಾಮನಗರಕ್ಕೆ ಪುತ್ರನೇ ಉತ್ತರಾಧಿಕಾರಿ ಎಂಬುದನ್ನು ಪುಷ್ಠೀಕರಿಸಿದ್ದಾರೆ. ದೇವೇಗೌಡರ ಕುಟುಂಬದ ಈ ಲೆಕ್ಕಾಚಾರ ಯಶಸ್ವಿಯಾದರೆ ರಾಮನಗರ ಜಿಲ್ಲೆಯಲ್ಲಿ ಕಾಂಗ್ರೆಸ್‌ಗೆ ಉಳಿಯುವುದು ಡಿ.ಕೆ. ಶಿವಕುಮಾರ್‌ ಪ್ರತಿನಿಧಿಸಿರುವ ಕನಕಪುರ ಮಾತ್ರ.

Related posts

 ರಾಮ ಜನ್ಮಭೂಮಿ ಇಂದು ಮುಕ್ತವಾಗಿದೆ, ಮಂದಿರ ಮೇಲೆದ್ದು ನಿಲ್ಲಲಿದೆ: ಪ್ರಧಾನಿ ಮೋದಿ

Times fo Deenabandhu

ಕೊರೊನಾ ಪರೀಕ್ಷೆಯಲ್ಲಿ ಸರಕಾರ ಫೇಲ್‌, 85 ಸಾವಿರಕ್ಕೂ ಹೆಚ್ಚು ಸ್ಯಾಂಪಲ್ಸ್‌ ಟೆಸ್ಟ್‌ ಇನ್ನೂ ಬಾಕಿ!

Times fo Deenabandhu

ಪೌರತ್ವ ತಿದ್ದುಪಡಿ ಕಾಯ್ದೆ ಜಾರಿ ಮಾಡಿಯೇ ಸಿದ್ಧ: ಅಮಿತ್‌ ಶಾ

Times fo Deenabandhu