Times of Deenabandhu
ಪ್ರಧಾನ ಸುದ್ದಿ ಮುಖ್ಯಾಂಶಗಳು ರಾಜಕೀಯ

ಡಿಕೆಶಿಗೆ ಸಿಗ್ತಿಲ್ಲ, ಖರ್ಗೆಗೆ ಬೇಕಿಲ್ಲ, ಸಿದ್ದು ಬಿಡ್ತಿಲ್ಲ..!

ಬೆಂಗಳೂರು: ರಾಜ್ಯ ಕಾಂಗ್ರೆಸ್‌ ಗುಂಪುಗಾರಿಕೆಗೆ ‘ಸರ್ಜರಿ’ ಸುಲಭವಲ್ಲ ಎಂಬುದು ಖಾತರಿಯಾಗಿ ಇಡೀ ಪ್ರಕ್ರಿಯೆಯನ್ನು ಎಐಸಿಸಿ ಹೈಕಮಾಂಡ್‌ ತಾತ್ಕಾಲಿಕವಾಗಿ ಮುಂದೂಡಿದೆ. ಆದರೆ, ಪಕ್ಷದ ಮೇಲೆ ಹಿಡಿತ ಸಾಧಿಸಲು ಸಿದ್ದರಾಮಯ್ಯ ಬಣ ಹಾಗೂ ಮೂಲ ಕಾಂಗ್ರೆಸಿಗರ ಬಣದ ನಡುವೆ ತಾಕಲಾಟ ಮುಂದುವರಿದಿದ್ದು, ದಿಲ್ಲಿ ಚುನಾವಣೆ ಮುಗಿದ ಬಳಿಕ ಫೆಬ್ರವರಿ ಮೊದಲ ವಾರದಲ್ಲಿ ರಾಜ್ಯ ಕಾಂಗ್ರೆಸ್‌ ನಾಯಕತ್ವ ನಿರ್ಧಾರವಾಗುವ ನಿರೀಕ್ಷೆಯಲ್ಲಿ ಎರಡೂ ಬಣಗಳು ಒತ್ತಡ ತಂತ್ರಗಾರಿಕೆ ಚುರುಕುಗೊಳಿಸಿವೆ.
ಕೆಪಿಸಿಸಿ ಅಧ್ಯಕ್ಷಗಾದಿ ಡಿ.ಕೆ.ಶಿವಕುಮಾರ್‌ ಪಾಲಾದರೆ ಪಕ್ಷದಲ್ಲಿನ ದಶಕದ ಅವಧಿಯ ತಮ್ಮ ‘ಪರ್ವಕಾಲ’ಕ್ಕೆ ತೆರೆಬೀಳುವ ಆತಂಕ ಸಿದ್ದರಾಮಯ್ಯ ಅವರದ್ದಾಗಿದ್ದು, ಅದಕ್ಕೆ ಅವಕಾಶ ಕೊಡದಿರಲು ಬಯಸಿದ್ದಾರೆ. ಡಿ.ಕೆ.ಶಿವಕುಮಾರ್‌ಗೆ ಅವಕಾಶ ತಪ್ಪಿಸಲು ಶತಪ್ರಯತ್ನ ನಡೆಸಿದ್ದಾರೆ. ಜತೆಜತೆಗೆ, ಪ್ರತಿಪಕ್ಷ ನಾಯಕ ಸ್ಥಾನದ ಸಂಪೂರ್ಣ ಅಧಿಕಾರ ಉಳಿಸಿಕೊಳ್ಳಲು ಸಿಎಲ್‌ಪಿ ಹಾಗೂ ಎಲ್‌ಒಒ (ಪ್ರತಿಪಕ್ಷ ನಾಯಕ) ವಿಭಜನೆ ಪ್ರಯತ್ನ ತಪ್ಪಿಸುವ ಬಗ್ಗೆ ತಲೆಕೆಡಿಸಿಕೊಂಡಿದ್ದಾರೆ.

ಮೂಲಕಾಂಗ್ರೆಸಿಗರ ಸಾಮೂಹಿಕ ನಾಯಕತ್ವ ಪ್ರತಿಪಾದನೆಯ ಈ ವಿಭಜನೆ ತಂತ್ರಕ್ಕೆ ಪ್ರತಿತಂತ್ರ ಹೆಣೆಯುವ ಪ್ರಯತ್ನ ಸಿದ್ದರಾಮಯ್ಯ ಬಣದಲ್ಲಿ ನಡೆದಿದೆ. ಮೈಸೂರು ಪ್ರವಾಸದಿಂದ ಮರಳಿ ಬಂದಿರುವ ಸಿದ್ದರಾಮಯ್ಯ ಅವರ ನಿವಾಸ ‘ಕಾವೇರಿ’ ಗುರುವಾರ ರಾಜಕೀಯ ಚಟುವಟಿಕೆಯ ಕೇಂದ್ರವಾಗಿತ್ತು. ಮೇಲ್ಮನೆ ಪ್ರತಿಪಕ್ಷ ನಾಯಕ ಎಸ್‌.ಆರ್‌.ಪಾಟೀಲ್‌, ಮಾಜಿ ಸಚಿವ ಜಮೀರ್‌ ಅಹ್ಮದ್‌, ಶಿವರಾಜ್‌ ತಂಗಡಗಿ, ಶಾಸಕರಾದ ಡಿ.ಎಸ್‌.ಹಲಗೇರಿ, ಅಂಜಲಿ ನಿಂಬಾಳ್ಕರ್‌, ರಾಘವೇಂದ್ರ ಹಿಟ್ನಾಳ್‌ ಸೇರಿ ಹಲವು ಪ್ರಮುಖರು ಸಿದ್ದರಾಮಯ್ಯ ನಿವಾಸದಲ್ಲಿ ಒಟ್ಟುಗೂಡಿ ಚರ್ಚಿಸಿದರು. ವಿಭಜನೆ ಸೂತ್ರ ಜಾರಿಯಾದರೆ, ಪ್ರತಿಪಕ್ಷ ನಾಯಕ ಅಥವಾ ಶಾಸಕಾಂಗ ಪಕ್ಷದ ನಾಯಕರಾಗಿ ಬೇರೊಬ್ಬರು ಅರ್ಧ ಅಧಿಕಾರ ಕಸಿದುಕೊಳ್ಳುತ್ತಾರೆ. ಕೆಪಿಸಿಸಿ ಅಧ್ಯಕ್ಷ ಗಾದಿ ಮೂಲ ಕಾಂಗ್ರೆಸಿಗರ ಪಾಲಾಗಿ, ಅರ್ಧ ಅಧಿಕಾರವೂ ಕಡಿತವಾದರೆ ತಮ್ಮ ಹಿತ ಕಾಯುವರು ಯಾರು ಎಂದು ಆಪ್ತರು ಸಿದ್ದರಾಮಯ್ಯ ಮುಂದೆ ಅಳಲು ತೋಡಿಕೊಂಡಿದ್ದಾರೆ. ಶಾಸಕಾಂಗ ಪಕ್ಷದ ನಾಯಕರೇ ಪ್ರತಿಪಕ್ಷ ಹುದ್ದೆಯಲ್ಲಿ ಮುಂದುವರಿಯುವ ವ್ಯವಸ್ಥೆ ಮುಂದುವರಿಸಲು ಹೈಕಮಾಂಡ್‌ ಮೇಲೆ ಒತ್ತಡ ತರುವ ಕುರಿತಂತೆ ಚರ್ಚೆ ನಡೆಯಿತು ಎಂದು ಹೇಳಲಾಗಿದೆ.
ಹೋಮ, ಪೂಜೆಗೆ ಡಿಕೆಶಿ ಶರಣು
ಕೆಪಿಸಿಸಿ ಅಧ್ಯಕ್ಷ ಗಾದಿ ಸಿಕ್ಕೇ ಬಿಟ್ಟಿತು ಎಂಬ ಕ್ಷಣದಲ್ಲೂ ಎದುರಾದ ತೊಡಕಿನಿಂದ ಡಿ.ಕೆ.ಶಿವಕುಮಾರ್‌ ಬೇಸರಗೊಂಡಿದ್ದಾರೆ. ಅನಿರೀಕ್ಷಿತವಾಗಿ ಎದುರಾಗುತ್ತಿರುವ ಈ ಅಡ್ಡಿ, ಆತಂಕಗಳ ನಿವಾರಣೆಗಾಗಿ ಡಿಕೆಶಿ ದೇವರ ಮೊರೆ ಹೋಗಿದ್ದಾರೆ. ದೂರದ ಮಧ್ಯಪ್ರದೇಶದ ಧಾತಿಗೆ ಡಿಕೆಶಿ ತೆರಳಿದ್ದು, ಅಲ್ಲಿನ ಪೀತಾಂಬರ ಪೀಠದ ಬಾಗಲ್ಮುಖಿ ಹಾಗೂ ಧೂಮವತಿ ದೇಗುಲದಲ್ಲಿ ಗುರುವಾರ ಹೋಮ, ವಿಶೇಷ ಪೂಜಾ ವಿಧಿ ವಿಧಾನಗಳನ್ನು ನಡೆಸಿದ್ದಾರೆ.
ಮಲ್ಲಿಕಾರ್ಜುನ ಖರ್ಗೆ ನಿರಾಸಕ್ತಿ

ಡಿ.ಕೆ.ಶಿವಕುಮಾರ್‌ಗೆ ಕೆಪಿಸಿಸಿ ಅಧ್ಯಕ್ಷಗಾದಿಯ ಹಾದಿ ಸುಸೂತ್ರವಾಗದ ಹಿನ್ನೆಲೆಯಲ್ಲಿ ಕೆಲವು ಮೂಲ ಕಾಂಗ್ರೆಸಿಗರು ಎಂ. ಮಲ್ಲಿಕಾರ್ಜುನ ಖರ್ಗೆ ನಾಯಕತ್ವದತ್ತ ಆಸಕ್ತಿ ಹೊರಳಿಸಿದ್ದಾರೆ. ಆದರೆ ಈ ಪ್ರಸ್ತಾಪವನ್ನು ಖರ್ಗೆ ಸಾರಾಸಗಟಾಗಿ ತಿರಸ್ಕರಿಸಿದ್ದು, ‘ಯಾವ ಕಾರಣಕ್ಕೂ ರಾಜ್ಯ ರಾಜಕಾರಣಕ್ಕೆ ಮರಳುವುದಿಲ್ಲ. ವರಿಷ್ಠರು ಬಯಸಿದರೆ ಜೂನ್‌ನಲ್ಲಿ ರಾಜ್ಯಸಭೆ ಪ್ರವೇಶಿಸುವುದು ಇಲ್ಲವಾದರೆ ಹೀಗೇ ಉಳಿಯುತ್ತೇನೆ’ ಎಂದು ಸ್ಪಷ್ಟಪಡಿಸಿದ್ದಾರೆ ಎಂದು ಹೇಳಲಾಗಿದೆ.

‘ಸಿದ್ದರಾಮಯ್ಯ ಅವರನ್ನು ಸಹಿಸಿಕೊಳ್ಳಲು ಆಗಲ್ಲ, ಡಿ.ಕೆ.ಶಿವಕುಮಾರ್‌ ಕಲ್ಚರ್‌ ಸರಿಹೊಂದಲ್ಲ. ಹೀಗಾಗಿ, ನೀವೇ ಮುಂದಾಳಾದರೆ ಪಕ್ಷದ ಭವಿಷ್ಯ ರಾಜ್ಯದಲ್ಲಿಅರಳುತ್ತದೆ’ ಎಂದು ಕೆಲವು ಹಿರಿಯರು ಬುಧವಾರ ರಾತ್ರಿ ಖರ್ಗೆ ಅವರ ಮನವೊಲಿಸುವ ಪ್ರಯತ್ನ ನಡೆಸಿದರು. ಎಂ. ವೀರಪ್ಪ ಮೊಯಿಲಿ, ಕೆ.ಎಚ್‌ ಮುನಿಯಪ್ಪ, ಮೋಟಮ್ಮ ಸೇರಿ ಹಲವರು ಈ ಸಲಹೆ ನೀಡಿದ್ದಾರೆ. ಆದರೆ, ಮತ್ತೆ ಕೆಪಿಸಿಸಿ ಸಾರಥ್ಯ ವಹಿಸಲು ತಾವು ಸಿದ್ಧರಿಲ್ಲ ಎಂಬುದನ್ನು ಖರ್ಗೆ ಅವರು ಸ್ಪಷ್ಟಪಡಿಸಿದ್ದಾರೆ ಎಂದು ಹೇಳಲಾಗಿದೆ.

Related posts

 ಏನಿದು ಜಿಎಸ್‌ಟಿ ವಿವಾದ, ರಾಜ್ಯಗಳಿಗೆ ಕೇಂದ್ರ ಏಕೆ ಹಣ ನೀಡುತ್ತಿಲ್ಲ?

Times fo Deenabandhu

ಕೊರೊನಾ ವೈರಸ್​ ಬಗೆಗಿನ 13 ಕಟ್ಟುಕತೆಗಳಿಗೆ ಸ್ಪಷ್ಟನೆ ನೀಡಿ ಎಚ್ಚರಿಕೆ ಸಂದೇಶ ರವಾನಿಸಿದ ವಿಶ್ವ ಆರೋಗ್ಯ ಸಂಸ್ಥೆ

Times fo Deenabandhu

ಇನ್ನು ಮುಂದೆ ತಿರುಪತಿ ಲಡ್ಡು ಉಚಿತ…..!

Times fo Deenabandhu