Times of Deenabandhu
  • Home
  • ಪ್ರಧಾನ ಸುದ್ದಿ
  • ಗುಮ್ನಾಮಿ ಬಾಬಾನೇ ನೇತಾಜಿಯೇ? ಇನ್ನೂ ಬಗೆಹರಿಯದ ನೇತಾಜಿ ಸುಭಾಷ್‌ ಚಂದ್ರ ಬೋಸ್‌ ಸಾವಿನ ನಿಗೂಢ
ಪ್ರಧಾನ ಸುದ್ದಿ ಮುಖ್ಯಾಂಶಗಳು

ಗುಮ್ನಾಮಿ ಬಾಬಾನೇ ನೇತಾಜಿಯೇ? ಇನ್ನೂ ಬಗೆಹರಿಯದ ನೇತಾಜಿ ಸುಭಾಷ್‌ ಚಂದ್ರ ಬೋಸ್‌ ಸಾವಿನ ನಿಗೂಢ

ಹೊಸದಿಲ್ಲಿ: ಸ್ವಾತಂತ್ರ್ಯ ಸೇನಾನಿ ನೇತಾಜಿ ಸುಭಾಸ್‌ಚಂದ್ರ ಬೋಸ್‌ ಸಾವಿನ ಸುತ್ತ ಹರಡಿರುವ ನಿಗೂಢ ಸಂಗತಿಗಳು ಅವರ 123ನೇ ಜನ್ಮದಿನದಂದು ಮತ್ತೆ ಚರ್ಚೆಗೆ ಗ್ರಾಸವಾಗಿವೆ. ಬಹುತೇಕರು ಭಾವಿಸಿದಂತೆ ನೇತಾಜಿ ವಿಮಾನ ದುರಂತದಲ್ಲಿಮಡಿದರೋ ಅಥವಾ ಗುಮ್ನಾಮಿ ಬಾಬಾ ರೂಪ ಧರಿಸಿ 1980ರ ದಶಕದವರೆಗೂ ಬದುಕಿದ್ದರೋ ಎನ್ನುವ ಪ್ರಶ್ನೆಗೆ ಇಂದಿಗೂ ಸ್ಪಷ್ಟ ಉತ್ತರ ಸಿಕ್ಕಿಲ್ಲ. ನೇತಾಜಿ ಸಾವಿನ ನಿಗೂಢ ಭೇದಿಸುವುದಕ್ಕಾಗಿಯೇ ನೇಮಕಗೊಂಡಿದ್ದ ವಿಷ್ಣು ಸಾಹಿ ಸಮಿತಿ ಕೂಡ ಈ ವಿಚಾರದಲ್ಲಿತಾರ್ಕಿಕ ಅಂತ್ಯ ನೀಡುವಲ್ಲಿವಿಫಲಗೊಂಡಿದ್ದು, ಮುಗಿಯದ ಕುತೂಹಲಕ್ಕೆ ಎಡೆಮಾಡಿಕೊಟ್ಟಿದೆ.
ಬೋಸ್‌ ತಮ್ಮದೇ ಆದ ಸೇನೆ ಕಟ್ಟಿ ಬ್ರಿಟಿಷರ ವಿರುದ್ಧ ಹೋರಾಡಿದ ವೀರ ಸೇನಾನಿ. ದೇಶ ಸ್ವಾತಂತ್ರ್ಯ ಗಳಿಸುವ ಕೊನೆ ಘಟ್ಟದಲ್ಲಿ ಅಂದರೆ 1945ರಲ್ಲಿ ಅವರು ವಿಮಾನ ದುರಂತದಲ್ಲಿ ಮಡಿದರು ಎಂದು ಅನೇಕರು ನಂಬಿದ್ದಾರೆ. ಆದರೆ, ಅವರು ಅಂದು ಸಾಯಲೇ ಇಲ್ಲ. ಉಗ್ರ ಹೋರಾಟ ತೊರೆದು ಗುಮ್ನಾಮಿ ಬಾಬಾ ಆಗಿ ಬದಲಾದರು. ಬಾಬಾ ಆಗಿ ಬದಲಾದ ನಂತರ ಉತ್ತರಪ್ರದೇಶದಲ್ಲಿ ನೆಲೆಸಿ 1985ರಲ್ಲಿ ಸಹಜ ಸಾವು ಅಪ್ಪಿದರು ಎಂದು ಕೆಲವರು ವಾದಿಸುತ್ತಿದ್ದಾರೆ.

ಗುಮ್ನಾಮಿ ಬಾಬಾನೇ ನೇತಾಜಿ ಅನ್ನುವುದಕ್ಕೆ ಅನೇಕ ಪುರಾವೆಗಳಿವೆ ಎಂದು ಹಲವು ಸಂಶೋಧಕರು ಹೇಳಿದ್ದಾರೆ. ಆದರೆ ಈ ಗುಮ್ನಾಮಿ ಬಾಬಾ ವಾದವನ್ನು ಇದುವರೆಗಿನ ಯಾವ ಸರಕಾರವೂ ಒಪ್ಪಿಲ್ಲ ಮತ್ತು ತಿರಸ್ಕರಿಸಿಯೂ ಇಲ್ಲ. ಇದರಿಂದ ಸಾವಿನ ನಿಗೂಢ ಕುರಿತ ಗೊಂದಲ ಇನ್ನಷ್ಟು ಗೊಂದಲಕ್ಕೆ ಕಾರಣವಾಗುತ್ತಲೇ ನಡೆದಿದೆ. ನೇತಾಜಿ ಗುಮ್ನಾಮಿ ಬಾಬಾ ವೇಷ ಧರಿಸಿದ ಬಳಿಕ ಉತ್ತರ ಪ್ರದೇಶದ ಅಯೋಧ್ಯೆಯ ರಾಮ ಭವನದಲ್ಲಿನೆಲೆ ನಿಂತರು. ಜೀವಿತದ ಕೊನೆಯನ್ನೂ ಅವರು ಅಲ್ಲಿಯೇ ಕಳೆದರು. ಅವರು ನೇತಾಜಿ ಅನ್ನುವುದಕ್ಕೆ ಅನೇಕ ಹೋಲಿಕೆಗಳಿವೆ. ಗಟ್ಟಿ ಧ್ವನಿ, ನಿಖರ ಜ್ಞಾನ, ತೀವ್ರ ಸಂಗೀತ ಆಸಕ್ತಿ, ಸಿಗರೇಟು ಹವ್ಯಾಸ, ಬಂಗಾಳಿ ಆಹಾರ ಇತ್ಯಾದಿ ವಿಷಯಗಳಲ್ಲಿಗಾಢ ಹೋಲಿಕೆ ಇದೆ ಎಂದು ಸಂಶೋಧಕರು ವಾದಿಸಿದ್ದಾರೆ.

ನೇತಾಜಿ ಸಾವಿನ ಗೊಂದಲ ಬಗೆಹರಿಸುವಂತೆ ಸಲ್ಲಿಕೆಯಾದ ಅರ್ಜಿಗಳ ವಿಚಾರಣೆ ನಡೆಸಿದ ಅಲಹಾಬಾದ್‌ ಹೈಕೋರ್ಟ್‌ 2016ರಲ್ಲಿ ಅಂದಿನ ಉತ್ತರಪ್ರದೇಶದ ಅಖಿಲೇಶ್‌ ಯಾದವ್‌ ಸರಕಾರಕ್ಕೆ ತನಿಖೆ ನಡೆಸುವಂತೆ ಆದೇಶ ನೀಡಿತ್ತು. ಅಖಿಲೇಶ್‌ ಸರಕಾರ ವಿಷ್ಣು ಸಾಹಿ ನೇತೃತ್ವದಲ್ಲಿತನಿಖಾ ಆಯೋಗ ರಚಿಸಿತ್ತು. ಆರು ವರ್ಷ ತನಿಖೆ ನಡೆಸಿದ ಆಯೋಗ, ಈಗಿನ ಯೋಗಿ ಆದಿತ್ಯನಾಥ್‌ ಸರಕಾರಕ್ಕೆ ವರದಿ ಒಪ್ಪಿಸಿದೆ. ಸಮಿತಿ ಗುಮ್ನಾಮಿ ಬಾಬಾನನ್ನು ನಿಖರವಾಗಿ ಗುರುತಿಸುವಲ್ಲಿವಿಫಲಗೊಂಡಿದೆ. ಆದರೆ ನೇತಾಜಿ-ಬಾಬಾ ನಡುವೆ ಕೆಲವು ಬಲವಾದ ಹೋಲಿಕೆಗಳಿವೆ ಎಂದು ಗುರುತಿಸಲಾಗಿದೆ.
ವಿಷ್ಣ ಸಾಹಿ ಆಯೋಗ ಗುರುತಿಸಿದ ಬಾಬಾ-ನೇತಾಜಿ ಹೋಲಿಕೆಗಳು

*ಗುಮ್ನಾಮಿ ಬಾಬಾ ಬಂಗಾಳಿ. ಬಂಗಾಳಿ, ಇಂಗ್ಲಿಷ್‌ ಮತ್ತು ಹಿಂದಿ ಭಾಷೆ ಮೇಲೆ ಪ್ರಭುತ್ವ ಹೊಂದಿದ್ದರು.

*ಗುಮ್ನಾಮಿ ಬಾಬಾ ಉಳಿದುಕೊಂಡಿದ್ದ ರಾಮ ಭವನದಿಂದ ಬಂಗಾಳಿ, ಇಂಗ್ಲಿಷ್‌ ಮತ್ತು ಹಿಂದಿ ಭಾಷೆಯ ಪುಸ್ತಕಗಳನ್ನು ವಶಪಡಿಸಿಕೊಳ್ಳಲಾಗಿದೆ.

*ಯುದ್ಧ, ರಾಜಕೀಯ ಮತ್ತು ಪ್ರಚಲಿತ ವಿದ್ಯಮಾನಗಳ ಬಗ್ಗೆ ಗುಮ್ನಾಮಿ ಬಾಬಾ ಅಪಾರ ಆಸಕ್ತಿ ಮತ್ತು ಜ್ಞಾನ ಹೊಂದಿದ್ದರು.

*ಗುಮ್ನಾಮಿ ಬಾಬಾರ ಧ್ವನಿ ನೇತಾಜಿ ಅವರಂತೆ ಖಚಿತ, ಕಂಚಿನ ಕಂಠದ್ದಾಗಿತ್ತು.

*ಅಯೋಧ್ಯೆಯಲ್ಲಿ 10 ವರ್ಷ ಕಾಲ ಅವರು ಬಹಿರಂಗವಾಗಿ ಕಾಣಿಸಿಕೊಂಡಿರಲೇ ಇಲ್ಲ.

*ಬಾಬಾ ಬಂಗಾಳಿ ಖಾದ್ಯ, ಸಂಗೀತ ಮತ್ತು ಸಿಗರೇಟಿನ ವ್ಯಾಮೋಹಿಯಾಗಿದ್ದರು.

*ತಾವು ನೇತಾಜಿ ಅನುಯಾಯಿ ಎಂದು ಹೇಳಿಕೊಳ್ಳುತ್ತಿದ್ದರು. ಆದರೆ ಅವರೇ ನೇತಾಜಿ ಇರಬಹುದೇ ಎಂದು ಜನರಲ್ಲಿ ಶಂಕೆ ಶುರುವಾದ ತಕ್ಷಣ ಅವರು ತಮ್ಮ ನೆಲೆ ಬದಲಾಯಿಸಿದರು.

Related posts

ಕೊರೊನಾ: ರೈಲು ಸೇವೆ ಸ್ಥಗಿತ ಏಪ್ರಿಲ್‌ 14ರವರೆಗೆ ವಿಸ್ತರಣೆ

Times fo Deenabandhu

ಸಿಎಂ ಮನೆಗೂ ಕಾಲಿಟ್ಟ ಕೊರೊನಾ, ಸಿಬ್ಬಂದಿಗೆ ಪಾಸಿಟಿವ್‌, ಯಡಿಯೂರಪ್ಪ ಕ್ವಾರಂಟೈನ್

 ಬಾಲಿವುಡ್‌ನ ಖ್ಯಾತ ನಟ ಅಮಿತಾಬ್ ಬಚ್ಚನ್‌ಗೆ ಕೋವಿಡ್-19 ದೃಢ