Times of Deenabandhu
ಧರ್ಮ ಪ್ರಧಾನ ಸುದ್ದಿ ಮುಖ್ಯಾಂಶಗಳು ರಾಜ್ಯ

13 ವರ್ಷಗಳ ಬಳಿಕ ಕಟೀಲು ಬ್ರಹ್ಮಕಲಶೋತ್ಸವಕ್ಕೆ ಮುಹೂರ್ತ

ಬಜಪೆ: ಕಟೀಲು ಶ್ರೀ ದುರ್ಗಾಪರಮೇಶ್ವರೀ ಕ್ಷೇತ್ರದಲ್ಲಿ13 ವರ್ಷ ಗಳ ಬಳಿಕ ಸಂಪನ್ನಗೊಳ್ಳಲಿರುವ ಅಪೂರ್ವ ಹಾಗೂ ಐತಿಹಾಸಿಕ ಮಹತ್ವದ ಬ್ರಹ್ಮಕಲಶೋತ್ಸವದ ಸಂಭ್ರಮದ ಕಾರ್ಯಕ್ರಮ ಜ.22ರಂದು ಬೆಳಗ್ಗೆ ಪ್ರಾರಂಭಗೊಳ್ಳಲಿದೆ. ಬೆಳಗ್ಗೆ 8ಕ್ಕೆ ಧಾರ್ಮಿಕ ಕಾರ್ಯಕ್ರಮಗಳು ಪ್ರಾರಂಭವಾಗಲಿದ್ದು, ಸಾಮೂಹಿಕ ಪ್ರಾರ್ಥನೆ, ತೋರಣ ಮುಹೂರ್ತ, ವೈದಿಕ ಉಗ್ರಾಣ ಮುಹೂರ್ತ, ರಥಬೀದಿಯಲ್ಲಿ ದೊಡ್ಡ ಉಗ್ರಾಣ ಮುಹೂರ್ತ, ಅರಣೀಮಥನ, ಬ್ರಹ್ಮಕೂರ್ಚ ಹೋಮ, ಅಥರ್ವ ಶೀರ್ಷ ಗಣಯಾಗ, ಸಂಜೆ 5ರಿಂದ ಸಪ್ತಶುದ್ಧಿ, ಗೋಪೂಜೆ, ವಾಸ್ತುಪೂಜೆ ನಡೆಯಲಿದೆ.

ಭ್ರಾಮರೀವನ (ಕುದುರು)ದಲ್ಲಿನ ಕಾರ್ಯಕ್ರಮಗಳು: ಶ್ರೀ ದೇವರ ಮೂಲಸಾನ್ನಿಧ್ಯ ಕುದುರು ಭ್ರಾಮರೀವನದಲ್ಲಿ ಬೆಳಿಗ್ಗೆ ತೋರಣ ಮುಹೂರ್ತ, ವಾಸ್ತುಪೂಜೆ, ಮಂಟಪ ಸಂಸ್ತಾರ, ಸಪ್ತಶುದ್ಧಿ ನಡೆಯಲಿದೆ. ಫೆ.2ರಂದು ಸಂಪನ್ನ ಗೊಳ್ಳಲಿರುವ ಕೋಟಿ ಜಪಯಜ್ಞಕ್ಕೆ ಪೂರ್ವಭಾವಿಯಾಗಿ ಹನ್ನೆರಡು ದಿನಗಳ ವ್ರತ ಸಂಕಲ್ಪ ಭ್ರಾಮರೀವನದಲ್ಲಿ ಜ.22ರ ಬೆಳಗ್ಗೆ ನಡೆಯಲಿದ್ದು ಸಾವಿರಾರು ಮಂದಿ ಪಾಲ್ಗೊಳ್ಳುವ ನಿರೀಕ್ಷೆ ಇದೆ. ಸರ್ವ ಮಂಗಳ ಮಾಂಗಲ್ಯೇ ಶಿವೇ ಸರ್ವಾರ್ಥ ಸಾಧಿಕೇ – ಶರಣ್ಯೇ ತ್ರತ್ರಯಂಬಕೇ ಗೌರೀ ನಾರಾಯಣಿ ನಮೋಸ್ತುತೇ ಶ್ಲೋಕ ಪಠಣದ 48 ದಿನಗಳ ಸುಧೀರ್ಘ ವ್ರತ ಸಂಕಲ್ಪ ಡಿ.15ರಂದು ನಡೆದಿತ್ತು.

ಒಡೆಯರ್‌ ಆಗಮನ ರದ್ದು: ಜ.20ರಂದು ಮಂಗಳೂರು ವಿಮಾನ ನಿಲ್ದಾಣದಲ್ಲಿ ಬಾಂಬ್‌ ಪತ್ತೆ ಪ್ರಕರಣದ ಹಿನ್ನೆಲೆಯಲ್ಲಿ ಭದ್ರತಾ ವ್ಯವಸ್ಥೆಗಳ ಕಾರಣದಿಂದ ಜ.22ರಂದು ಕಟೀಲು ಬ್ರಹ್ಮ ಕಲಶೋತ್ಸವ ಕಾರ್ಯಕ್ರಮಗಳ ಮುಹೂರ್ತ, ಉದ್ಘಾಟನೆಗೆ ಆಗಮಿಸಬೇಕಾಗಿದ್ದ ಮೈಸೂರಿನ ಮಹಾಸಂಸ್ಥಾನದ ಯದುವೀರ್‌ ಕೃಷ್ಣದತ್ತ ಒಡೆಯರ್‌ ಅವರ ಆಗಮನ ಕಾರ‍್ಯಕ್ರಮವನ್ನು ಭದ್ರತಾ ಇಲಾಖೆ ಇಂದಿನ ಮಟ್ಟಿಗೆ ತಡೆಹಿಡಿಯಲಾಗಿದೆ ಎಂದು ತಿಳಿದುಬಂದಿದೆ.

ಬುಧವಾರದ ಸಾಂಸ್ಕೃತಿಕ ಕಾರ‍್ಯಕ್ರಮ: ಬೆಳಗ್ಗೆ 8ರಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳು ಪ್ರಾರಂಭಗೊಳ್ಳಲಿದ್ದು ಧರ್ಮಸ್ಥಳ ಅಣ್ಣಿ ದೇವಾಡಿಗ ಮತ್ತು ಬಳಗದ ನಾದ ಸ್ವರವಾದನ, ಬೆಳಗ್ಗೆ 11ರಿಂದ ಪ್ರಸಿದ್ಧ ಕಲಾವಿದರ ಕೂಡುವಿಕೆಯಲ್ಲಿ ಯಕ್ಷಗಾನ ತಾಳಮದ್ದಳೆ, ಹಾಡುಗಾರಿಕೆ ಕಾಂಚನ ಸಹೋದರಿಯರಿಂದ, ರಾತ್ರಿ 7ರಿಂದ ವಯೋಲಿನ್‌ ವಾದನ, ಪದ್ಮಭೂಷಣ ಡಾ.ಎನ್‌. ಸುಬ್ರಹ್ಮಣ್ಯ ಮತ್ತು ಬಳಗ, ರಾತ್ರಿ 9ರಿಂದ ನೃತ್ಯ ವೈವಿಧ್ಯ ಜರುಗಲಿದೆ.

ಧಾರ್ಮಿಕ ಸಭೆ: ಸಂಜೆ 5ರಿಂದ ಧಾರ್ಮಿಕ ಸಭಾ ಕಾರ‍್ಯಕ್ರಮ ಜರುಗಲಿದ್ದು ಕಾಣಿಯೂರು ಶ್ರೀ ವಿದ್ಯಾವಲ್ಲಭ ತೀರ್ಥ ಶ್ರೀ ಪಾದಂಗಳವರು, ಕರಿಂಜೆ ಶ್ರೀ ಮುಕ್ತಾನಂದ ಸ್ವಾಮೀಜಿ ಅವರು ಅನುಗ್ರಹ ಸಂದೇಶ ನೀಡಲಿದ್ದು ಶರವು ರಾಘವೇಂದ್ರ ಶಾಸ್ತ್ರಿ ಅವರು ಅಧ್ಯಕ್ಷತೆ ವಹಿಸುವರು. ಇದೇ ವೇಳೆ ವೀಣಾ ಬನ್ನಂಜೆ ಅವರು ಬದುಕು ಮತ್ತು ದೇವರು ವಿಶಯವಾಗಿ ಉಪನ್ಯಾಸ ನೀಡಲಿದ್ದಾರೆ.

ನಿರಂತರ ಹೊರೆಕಾಣಿಕೆ ಆಗಮನ, ದಾಸೋಹ ವೈವಿಧ್ಯ:
ಬೆಳಗ್ಗೆ 8.30ರ ವೇಳೆಗೆ ಶಿಬರೂರಿನಿಂದ ವೈದಿಕ ಸಾಮಗ್ರಿ ಗಳ ವೈದಿಕ ಹೊರೆಕಾಣಿಕೆ ಆಗಮಿಸಲಿದ್ದು ನಂತರದಲ್ಲಿನಾಡಿನೆಲ್ಲೆಡೆಯಿಂದ ಹೊರೆಕಾಣಿಕೆಗಳ ಮೆರವಣಿಗೆ ನಿರಂತರ ಆಗಮಿಸಲಿದೆ. ಕ್ಷೇತ್ರದ ಸಿತ್ಲಬೈಲಿನ ವಿಶಾಲ ಅನ್ನದೇಗುಲದಲ್ಲಿ ಬೆಳಿಗ್ಗೆ 6ರಿಂದ ಮೂಡೆಗಸಿಯೊಂದಿಗೆ ಪ್ರಾರಂಭಗೊಳ್ಳುವ ಉಪಹಾರ 11.30ರವರೆಗೂ ವೆರೈಟಿ ತಿಂಡಿಗಳು, ಸ್ವೀಟ್‌ ಕಡಿ ಚಹಾ-ಕಾಫಿ ಉಪಹಾರ, 11.30ರಿಂದ ರುಚಿ- ರುಚಿಯ ಅನ್ನದಾನ 3 ಗಂಟೆವರೆಗೆ ಬಳಿಕ 3.30ರಿಂದ ರಾತ್ರಿ 7ರವರೆಗೆ ಲಘು ಉಪಹಾರ. ರಾತ್ರಿ 7ರಿಂದ ಮತ್ತೆ ಅನ್ನದಾನ ಪ್ರಾರಂಭಗೊಂಡು ಮಧ್ಯರಾತ್ರಿ 1 ಗಂಟೆಯವರೆಗೂ ನೆರವೇರಲಿದೆ.

ಇತರ ವ್ಯವಸ್ಥೆಗಳು: ಗಿಡಿಗೆರೆಯಿಂದ ಅಜಾರುವರೆಗೆ ವ್ಯಾಪಾರ ಮಳಿಗೆ-ಸ್ಟಾಲುಗಳು, ಡಿಗ್ರಿ ಕಾಲೇಜು ಮೈದಾನದಲ್ಲಿ ಮಕ್ಕಳ ಮನರಂಜನೆ ಕೇಂದ್ರ ಮೊದಲಾದ ವ್ಯವಸ್ಥೆಗಳಿವೆ.

ವಾಹನಗಳಿಗೆ ಸೂಚನೆ: ಬಜಪೆ ಕಡೆಯಿಂದ ಮುಖ್ಯ ಕಡೆಗೆ ನೇರ ಹೋಗುವವರು ಶಿಬರೂರು ರಸ್ತೆಯಲ್ಲಿ, ಕಟೀಲು ಕಡೆಗೆ ಬರುವವರು ಎಕ್ಕಾರು ರಸ್ತೆಯಲ್ಲಿಆಗಮಿಸಿ ಅಲ್ಲಲ್ಲಿಪಾರ್ಕಿಂಗ್‌ ವ್ಯವಸ್ಥೆ, ಸೂಚನಾ ಫಲಕಗಳನ್ನು ಗಮನಿಸಿ ಸ್ವಯಂ ಸೇವಕರ ಸಹಾಯ ಪಡೆದು ಪ್ರಯಾಣ ಮುಂದುವರಿಸಬಹುದಾಗಿದ್ದು, ಕಿನ್ನಿಗೋಳಿ ಕಡೆಯಿಂದ ಬರುವವರು ಗಿಡಿಗೆರೆವರೆಗೂ ಆಗಮಿಸಿ ಬಲಕ್ಕೆ ತಿರುಗಿ ಮುಂದುವರಿಯಬೇಕು.

ಜೀರೋ ಟ್ರಾಫಿಕ್‌: ಬ್ರಹ್ಮಕಲಶೋತ್ಸವ ಕಾರ‍್ಯಕ್ರಮಗಳು ನಡೆಯುವ ಎಲ್ಲದಿನಗಳಲ್ಲಿಕಟೀಲು ಸೇತುವೆ- ಪೆಟ್ರೋಲ್‌ ಪಂಪ್‌ ಬಳಿಯಿಂದ ರಥಬೀದಿಗಾಗಿ ಅಜಾರು ವರೆಗೂ ಯಾವುದೇ ರೀತಿಯ ವಾಹನಗಳಿಗೂ ಸಂಚರಿ ಸಲು ಅವಕಾಶವಿಲ್ಲ. ಹೊರೆಕಾಣಿಕೆ ಮತ್ತು ವಿಶೇಷ ಅಗತ್ಯ ದ ವಾಹನಗಳು ಸ್ವಯಂ ಸೇವಕರ ಮೂಲಕ ಮಾಹಿತಿ ಕೇಂದ್ರದ ಸೂಚನೆಯಂತೆ ಮುಂದುವರಿಯಬೇಕು.

ಸ್ವಯಂ ಸೇವಕರು, ಪೊಲೀಸ್‌, ಹೋಂಗಾರ್ಡ್‌: ಬುಧವಾರದಿಂದ ಪ್ರತಿನಿತ್ಯ ಎಲ್ಲವ್ಯವಸ್ಥೆಗಳಿಗೆ ಅನ್ವಯಿಸಿ ಸಾವಿರಾರು ಸ್ವಯಂಸೇವಕರು, ವಿಶೇಷ ಪೊಲೀಸ್‌ ವ್ಯವಸ್ಥೆ ಹಾಗೂ ಹೋಂಗಾರ್ಡ್‌ ವ್ಯವಸ್ಥೆಯನ್ನು ಬ್ರಹ್ಮಕಲಶೋತ್ಸವ ಸಮಿತಿ ಹಾಗೂ ಜಿಲ್ಲಾಡಳಿತಗಳು ಕೈಗೊಂಡಿವೆ.

Related posts

ರಂಗಭೂಮಿಯಿಂದ ಉದಯಿಸಿದ ಅಭಿಜಾತ ಪ್ರತಿಭೆ ಶಾಂತಮ್ಮ

ಮಹಾತ್ಮಾಗಾಂಧಿ ಹತ್ಯೆ ಪ್ರಕರಣ ಮರು ವಿಚಾರಣೆ ನಡೆಸಬೇಕು; ಡಾ. ಸುಬ್ರಮಣಿಯನ್ ಸ್ವಾಮಿ

Times fo Deenabandhu

 ಬಣ್ಣ–ಬಣ್ಣದ ಸಮವಸ್ತ್ರದಲ್ಲಿ ಮಿಂಚಲಿದ್ದಾರೆ ಚಿಣ್ಣರು

Times fo Deenabandhu