Times of Deenabandhu
  • Home
  • ಮುಖ್ಯಾಂಶಗಳು
  • ‘5 ಬಾರಿ ಗೆದ್ದಿದ್ದೇನೆ.. ನಾನೂ ಸಚಿವ ಸ್ಥಾನದ ಆಕಾಂಕ್ಷಿ’ : ಮಡಿಕೇರಿ ಶಾಸಕ ಅಪ್ಪಚ್ಚು
ಮುಖ್ಯಾಂಶಗಳು ರಾಜಕೀಯ

‘5 ಬಾರಿ ಗೆದ್ದಿದ್ದೇನೆ.. ನಾನೂ ಸಚಿವ ಸ್ಥಾನದ ಆಕಾಂಕ್ಷಿ’ : ಮಡಿಕೇರಿ ಶಾಸಕ ಅಪ್ಪಚ್ಚು

ಮಡಿಕೇರಿ (ಕೊಡಗು): ಐದು ಬಾರಿ ಚುನಾವಣೆಯಲ್ಲಿ ಗೆದ್ದಿರುವ ನಾನೂ ಕೂಡ ಸಚಿವ ಸ್ಥಾನದ ಆಕಾಂಕ್ಷಿ ಎಂದು ಮಡಿಕೇರಿ ಕ್ಷೇತ್ರದ ಶಾಸಕ ಎಂ.ಪಿ ಅಪ್ಪಚ್ಚು ರಂಜನ್‌ ಹೇಳಿದ್ದಾರೆ. ಮಡಿಕೇರಿಯಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ‘ಕರ್ನಾಟಕದ 15 ಕ್ಷೇತ್ರಗಳಿಗೆ ನಡೆದ ಉಪಚುನಾವಣೆಯಲ್ಲಿ 12 ಕ್ಷೇತ್ರಗಳಲ್ಲಿ ಬಿಜೆಪಿ ಭರ್ಜರಿ ಗೆಲುವು ಸಾಧಿಸಿದೆ. ಈ ಬೆನ್ನಲ್ಲೇ ಸಚಿವ ಸಂಪುಟದ ಕಸರತ್ತು ಶುರುವಾಗಿದೆ. ಯಾರಿಗೆಲ್ಲಾ ಸಚಿವ ಸ್ಥಾನ ಸಿಗಲಿದೆ ಅನ್ನೋ ಚರ್ಚೆ ನಡೆಯುತ್ತಿದೆ. ಸಚಿವ ಸ್ಥಾನಕ್ಕೆ ನಾನು ಕೂಡ ಆಕಾಂಕ್ಷಿಯೇ. 5 ಬಾರಿ ಗೆದ್ದು ಶಾಸಕನಾಗಿದ್ದೇನೆ. ಆದರೆ ಹೈಕಮಾಂಡ್‌ ತೀರ್ಮಾನಕ್ಕೆ ಬದ್ಧನಾಗಿದ್ದೇನೆ’ ಎಂದು ಅಪ್ಪಚ್ಚು ರಂಜನ್ ಹೇಳಿದ್ದಾರೆ.

‘ಉಪಚುನಾವಣೆಯಲ್ಲಿ ಗೆದ್ದು ಬಂದಿರುವ ಶಾಸಕರಿಗೆ ಸಚಿವ ಸ್ಥಾನ ನೀಡಲೇಬೇಕಾಗುತ್ತದೆ. ಈ ಬಗ್ಗೆ ಮೊದಲೇ ಮಾತುಕತೆ ನಡೆದಿದೆ. ಬಾಕಿ ಉಳಿಯುವ ಖಾಲಿ ಸ್ಥಾನಕ್ಕೆ ನಾನು ಕೂಡ ಆಕಾಂಕ್ಷಿ’ ಎಂದು ಅಪ್ಪಚ್ಚು ರಂಜನ್ ಸ್ಪಷ್ಟಪಡಿಸಿದರು.

‘ಪಠ್ಯದಲ್ಲಿ ಟಿಪ್ಪು ಅಳವಡಿಸುವುದಾದರೆ ಸತ್ಯವನ್ನೂ ತಿಳಿಸಲಿ’

ಇದೇ ವೇಳೆ, ಪಠ್ಯ ಪುಸ್ತಕದಿಂದ ಟಿಪ್ಪು ಅಧ್ಯಾಯ ಕೈಬಿಡುವ ವಿಚಾರದ ಬಗ್ಗೆ ಪ್ರತಿಕ್ರಿಯಿಸಿದ ಶಾಸಕ ರಂಜನ್‌, ‘ಪಠ್ಯ ಪುಸ್ತಕ ಸಮಿತಿಯೊಂದಿಗೆ ಈಗಾಗಲೇ ಸಭೆ ನಡೆಸಲಾಗಿದೆ. ಸುಮಾರು 2 ಗಂಟೆಗಳ ಕಾಲ ಚರ್ಚೆ ನಡೆದಿದೆ. ಹಲವಾರು ದಾಖಲೆಗಳನ್ನು ಸಲ್ಲಿಸಿದ್ದೇನೆ. ಟಿಪ್ಪುವಿನ ವಿಚಾರಧಾರೆಗಳನ್ನು ಪುಸ್ತಕದಲ್ಲಿ ಅಳವಡಿಸುವುದಾದರೆ ಸತ್ಯ ಘಟನೆಗಳನ್ನೂ ಹಾಕಬೇಕೆಂಬುದು ನನ್ನ ಒತ್ತಾಯ. ಆತನಿಂದ ನಡೆದ ಕೊಲೆ, ಅತ್ಯಾಚಾರ, ಮತಾಂತರ ಮಾಡಿದ ವಿಷಯಗಳನ್ನು ಕೂಡ ಹಾಕಬೇಕು. ಜನರಿಗೆ ಸುಳ್ಳು ಹೇಳುವ ಕೆಲಸವನ್ನು ಮಾಡಬಾರದು. ಟಿಪ್ಪುವಿನ ವಿಚಾರ ಪಠ್ಯ ಪುಸ್ತಕದಲ್ಲಿ ಇರಬೇಕು ಎಂದಾದರೆ ಸತ್ಯ ಸಂಗತಿಯನ್ನು ಹಾಕುವಂತೆ ಮತ್ತೊಮ್ಮೆ ಒತ್ತಾಯಿಸುತ್ತೇನೆ’ ಎಂದು ಅಪ್ಪಚ್ಚು ರಂಜನ್ ಹೇಳಿದರು.

Related posts

ದೇಶದ ಆತ್ಮವನ್ನೇ ಕೊಂದ ಬಿಜೆಪಿ: ಸಿದ್ದರಾಮಯ್ಯ ಕಿಡಿ

ಯಾದಗಿರಿ: ಶವ ಎಳೆದೊಯ್ದು ಗುಂಡಿಗೆ ಎಸೆದ ಸಿಬ್ಬಂದಿ

ಕಳೆದುಕೊಂಡಿದ್ದ ದೃಷ್ಟಿ ಅಪಘಾತದ ಬಳಿಕ ಮತ್ತೆ ಬಂತು…! ವೈದ್ಯರು ಏನು ಹೇಳುತ್ತಾರೆ…?

Times fo Deenabandhu