Times of Deenabandhu
ದೇಶ ಪ್ರಧಾನ ಸುದ್ದಿ ಮುಖ್ಯಾಂಶಗಳು

ಯುಪಿ ರೇಪ್‌ ಕ್ಯಾಪಿಟಲ್‌ , ಒಂದೇ ವರ್ಷದಲ್ಲಿ 86 ರೇಪ್‌!

ಲಖನೌ: ಕಾಮುಕರ ಕೌರ್ಯದ ಪರಾಕಾಷ್ಠೆಯಲ್ಲಿ ಉನ್ನಾವೊ ಅತ್ಯಾಚಾರ ಸಂತ್ರಸ್ತೆ ಬೆಂದುಹೋದ ಬೆನ್ನಲ್ಲೇ ಉತ್ತರ ಪ್ರದೇಶದ ಈ ಜಿಲ್ಲೆಯಲ್ಲಿ ಕಳೆದೊಂದು ವರ್ಷದಲ್ಲಿ 86 ಅತ್ಯಾಚಾರ ಪ್ರಕರಣಗಳು ವರದಿಯಾಗಿರುವುದು ಬೆಳಕಿಗೆ ಬಂದಿದೆ. ರಾಜ್ಯ ರಾಜಕಾರಣದಲ್ಲಿ ಪ್ರಭಾವಿ ಸಚಿವರು, ಸಂಸದರನ್ನು ಹೊಂದಿರುವ ಉನ್ನಾವೊ ಜಿಲ್ಲೆಯಲ್ಲಿ ಒಂದೇ ಸಮನೆ ಅತ್ಯಾಚಾರ ಪ್ರಕರಣಗಳು ಹೆಚ್ಚುತ್ತಲೇ ಇದ್ದು ಉತ್ತರ ಪ್ರದೇಶದ ‘ರೇಪ್‌ ಕ್ಯಾಪಿಟಲ್‌’ ಎಂಬ ಕುಖ್ಯಾತಿಗೆ ಒಳಗಾಗಿದೆ.

ಉನ್ನಾವೊ 31 ಲಕ್ಷ ಜನಸಂಖ್ಯೆ ಹೊಂದಿರುವ ಜಿಲ್ಲೆ. ಜಿಲ್ಲೆಯಲ್ಲಿ ಈ ವರ್ಷದ ಜನವರಿಯಿಂದ ನವೆಂಬರ್‌ವರೆಗೆ 86 ಅತ್ಯಾಚಾರ ಹಾಗೂ 185 ಲೈಂಗಿಕ ದೌರ್ಜನ್ಯ ಪ್ರಕರಣಗಳು ನಡೆದಿವೆ ಎಂದು ಪೊಲೀಸ್‌ ವರದಿ ಹೇಳಿದೆ. ಬಹುತೇಕ ಪ್ರಕರಣಗಳಲ್ಲಿ ಆರೋಪಿಗಳ ಬಂಧನವಾಗಿದ್ದರೂ ಜಾಮೀನಿನ ಮೇಲೆ ಹೊರಗಿರುವವರೇ ಹೆಚ್ಚು. ಇನ್ನೂ ಕೆಲ ಆರೋಪಿಗಳು ತಲೆಮರೆಸಿಕೊಂಡಿದ್ದು ಇದು ಪೊಲೀಸರ ಕಾರ್ಯಕ್ಷಮತೆಯನ್ನು ಪ್ರಶ್ನಿಸುವಂತೆ ಮಾಡಿದೆ. ಜಿಲ್ಲೆಯ ಉನ್ನಾವೊ, ಅಸೋಹಾ, ಅಜ್ಗೈನ್‌, ಮಾಕಿ ಹಾಗೂ ಬಾಂಗ್ರಾಮಾವುನಲ್ಲಿ ಹೆಚ್ಚು ಪ್ರಕರಣಗಳು ವರದಿಯಾಗಿವೆ.

ಪೊಲೀಸರ ವರ್ತನೆಗೆ ಆಕ್ರೋಶ
“ವಿಧಾನಸಭೆ ಸ್ಪೀಕರ್‌ ಹೃದಯನಾರಾಯಣ ದೀಕ್ಷಿತ್‌, ಕಾನೂನು ಸಚಿವ ಬ್ರಿಜೇಶ್‌ ಪಾಠಕ್‌ ಹಾಗೂ ಬಿಜೆಪಿ ಸಂಸದ ಸಾಕ್ಷಿ ಮಹಾರಾಜ್‌ ಸೇರಿದಂತೆ ಕೆಲ ಪ್ರಭಾವಿ ರಾಜಕಾರಣಿಗಳು ಉನ್ನಾವೊ ಕ್ಷೇತ್ರಕ್ಕೆ ಸೇರಿದವರು. ರಾಜಕೀಯ ಅಪರಾಧಗಳು ಇಲ್ಲಿ ಮಾಮೂಲಿಯಾಗಿದ್ದು, ಅಪರಾಧವೂ ರಾಜಕಾರಣದ ಅಸ್ತ್ರವಾಗಿದೆ. ಹೀಗಾಗಿಯೇ ಉನ್ನಾವೊ ಪೊಲೀಸರು ದಿಟ್ಟ ನಿರ್ಧಾರ ಕೈಗೊಳ್ಳಲಾರರು. ರಾಜಕೀಯ ಪ್ರಭಾವದಿಂದ ಮೇಲಧಿಕಾರಿಗಳ ಅನುಮತಿ ಪಡೆಯದ ಹೊರತು ಕ್ರಮವನ್ನೇ ಜರುಗಿಸುವುದಿಲ್ಲ,” ಎಂದು ಆಕ್ರೋಶ ಹೊರಹಾಕುತ್ತಾರೆ ಸ್ಥಳೀಯ ನಿವಾಸಿ ರಾಘವ್‌ ರಾಮ್‌ ಶುಕ್ಲಾ. ಇತ್ತೀಚೆಗೆ ನ್ಯೂ ಟೌನ್‌ಶಿಪ್‌ ನಿರ್ಮಾಣ ಸಂಬಂಧ ರೈತರು ನಡೆಸಿದ್ದ ಹಿಂಸಾಚಾರ ಪ್ರಕರಣದಲ್ಲಿ ಪೊಲೀಸರು ಒಬ್ಬರ ವಿರುದ್ಧವೂ ಪ್ರಕರಣ ದಾಖಲಿಸಿಲ್ಲ ಎಂಬುದು ಇದಕ್ಕೆ ಒಂದು ಉದಾಹರಣೆ.

ಬಿಜೆಪಿ ಉಚ್ಛಾಟಿತ ನಾಯಕ ಕುಲದೀಪ್‌ ಸೆಂಗಾರ್‌ ಒಳಗೊಂಡ ಉನ್ನಾವೊ ಅತ್ಯಾಚಾರ ಪ್ರಕರಣ ಇದಕ್ಕೆ ಒಂದು ಅತ್ಯುತ್ತಮ ಉದಾಹರಣೆ. ಸಂತ್ರಸ್ತೆ ಮೊದಲು ದೂರು ನೀಡಿದಾಗ, ದೂರುದಾರೆ ಲಖನೌಗೆ ಬಂದು ಮುಖ್ಯಮಂತ್ರಿ ನಿವಾಸದ ಎದುರು ಆತ್ಮಹತ್ಯೆಗೆ ಯತ್ನಿಸುವವರೆಗೂ ಸುಮಾರು 9 ತಿಂಗಳವರೆಗೆ ಯಾವುದೇ ಕ್ರಮ ಕೈಗೊಳ್ಳಲಿಲ್ಲ. ಸಂತ್ರಸ್ತೆಯ ತಂದೆಯನ್ನು ಬಂಧಿಸಲಾಗಿತ್ತು. ಆದರೆ ಆರೋಪಿ ಶಾಸಕನ ಸಹೋದರನ ಪ್ರಭಾವದಿಂದ ಸಂತ್ರಸ್ತೆ ತಂದೆ ಪೊಲೀಸ್‌ ಕಸ್ಟಡಿಯಲ್ಲಿಯೇ ಸಾಯುವಂತಾಯಿತು ಎಂಬ ಆರೋಪವೂ ಇದೆ. ಕುಲದೀಪ್‌ ಸೆಂಗಾರ್‌ ಮತ್ತು ಅವರ ಸಹೋದರನನ್ನು ಬಂಧಿಸುವಂತೆ ಮಾಧ್ಯಮಗಳಿಂದ ತೀವ್ರ ಒತ್ತಡ ಬಂದಿದ್ದರೂ ಎಷ್ಟೋ ತಿಂಗಳು ಪೊಲೀಸರು ನಿರ್ಲಕ್ಷ್ಯ ತೋರಿದ್ದರು.

Related posts

 ಗ್ರಾಮೀಣ ಭಾಗಗಳಲ್ಲಿ ಇಂಟರ್ನೆಟ್‌ ಸಂಪರ್ಕ ಸುಧಾರಣೆ: ಅಶ್ವತ್ಥನಾರಾಯಣ

 ಬಕ್ರೀದ್‌ ಹಬ್ಬ: ಸಾಮೂಹಿಕ ಪ್ರಾರ್ಥನೆಗೆ ನಿರ್ಬಂಧ

ಸಚಿವ ಸ್ಥಾನ ಆಕಾಂಕ್ಷಿಗಳಿಗೆ ಸಿಗಲಿದೆಯಾ ಗುಡ್​ ನ್ಯೂಸ್​

Times fo Deenabandhu