Times of Deenabandhu
  • Home
  • ಮುಖ್ಯಾಂಶಗಳು
  • ಪಿಜ್ಜಾ ಆರ್ಡರ್‌ ಮಾಡಿ 2 ನಿಮಿಷದಲ್ಲಿ 95 ಸಾವಿರ ರೂ. ಕಳೆದುಕೊಂಡ ಟೆಕ್ಕಿ!
ಪ್ರಧಾನ ಸುದ್ದಿ ಮುಖ್ಯಾಂಶಗಳು

ಪಿಜ್ಜಾ ಆರ್ಡರ್‌ ಮಾಡಿ 2 ನಿಮಿಷದಲ್ಲಿ 95 ಸಾವಿರ ರೂ. ಕಳೆದುಕೊಂಡ ಟೆಕ್ಕಿ!

ಬೆಂಗಳೂರು: ಸಾರ್ವಜನಿಕರ ಖಾತೆಗೆ ಕನ್ನ ಹಾಕಲು ಸಾವಿರಾರು ಮಾರ್ಗಗಳನ್ನು ಕಂಡುಕೊಂಡಿರುವ ಸೈಬರ್‌ ಖದೀಮರ ಕೈಚಳಕಕ್ಕೆ ಟೆಕ್ಕಿಯೊಬ್ಬರು 95 ಸಾವಿರ ರೂಪಾಯಿಯನ್ನು ಕೇವಲ 2 ನಿಮಿಷದಲ್ಲಿ ಕಳೆದುಕೊಂಡಿದ್ದಾರೆ.

ನಗರದ ಪ್ರತಿಷ್ಠಿತ ಕಂಪನಿಯಲ್ಲಿ ಕೆಲಸ ಮಾಡುವ ಸಾಫ್ಟ್‌ವೇರ್‌ ಎಂಜಿನಿಯರ್‌ ಶೇಕ್‌ ಡಿ.1 ರಂದು ಪಿಜ್ಜಾಗಾಗಿ ಆ್ಯಪ್‌ ಮೂಲಕ ಆರ್ಡರ್‌ ಮಾಡಿದ್ದರು. ಕೋರಮಂಗಲದ ತಮ್ಮ ನಿವಾಸದ ವಿಳಾಸಕ್ಕೇ ಆರ್ಡರ್‌ ಮಾಡಿ ಎರಡು ಗಂಟೆ ಕಳೆದರೂ ಪಿಜ್ಜಾ ಮಾತ್ರ ಬರಲಿಲ್ಲ. ಹೀಗಾಗಿ, ಅದೇ ಆ್ಯಪ್‌ನಲ್ಲಿದ್ದ ಮೊಬೈಲ್‌ ನಂಬರಿಗೆ ಕರೆ ಮಾಡಿ ಹಣ ಪಾವತಿಯಾಗಿ 2 ಗಂಟೆ ಆಗಿದೆ. ಇದುವರೆಗೂ ಪಿಜ್ಜಾ ಬಂದಿಲ್ಲ ಏಕೆ ಎಂದು ಕೇಳಿದ್ದರು. ಇವರ ಕರೆಗೆ ಬಹಳ ಸೌಜನ್ಯದಿಂದಲೇ ಅತ್ತ ಕಸ್ಟಮರ್‌ ಕೇರ್‌ನಿಂದ ಉತ್ತರಿಸಿದ ಯುವತಿ, ”ಕ್ಷಮಿಸಿ ನಾವು ಪಿಜ್ಜಾಗಳನ್ನು ಡೆಲಿವರಿ ಮಾಡುವುದಿಲ್ಲ. 20 ನಿಮಿಷದಲ್ಲಿನಿಮ್ಮ ಹಣ ನಿಮ್ಮ ಖಾತೆಗೆ ವಾಪಸ್ಸಾಗುತ್ತದೆ. ನಿಮ್ಮ ಮೊಬೈಲಿಗೆ ಒಂದು ಲಿಂಕ್‌ ಬರುತ್ತದೆ. ಆ ಲಿಂಕ್‌ ಬಂದ ತಕ್ಷಣ ನೀವು ಆ ಲಿಂಕನ್ನು ಓಪನ್‌ ಮಾಡಿ ಕೆಲವು ವಿವರಗಳನ್ನು ಭರ್ತಿ ಮಾಡಿ. ಬಳಿಕ ನಿಮ್ಮ ಹಣ ನಿಮ್ಮ ಖಾತೆಗೆ ವಾಪಸ್ಸಾಗುತ್ತದೆ” ಎಂದು ತಿಳಿಸಿದ್ದರು.

ಕರೆ ಸ್ಥಗಿತಗೊಳಿಸಿದ ಕೂಡಲೇ ಶೇಕ್‌ ಅವರ ಮೊಬೈಲಿಗೆ ಒಂದು ಲಿಂಕ್‌ ಬಂದಿತ್ತು. ಆ ಲಿಂಕ್‌ ತೆರೆದು ತಮ್ಮ ಬ್ಯಾಂಕ್‌ ಖಾತೆ ವಿವರಗಳನ್ನು ಭರ್ತಿ ಮಾಡಿದ್ದರು. ಸಾಲದ್ದಕ್ಕೆ ಅದರಲ್ಲಿಕೇಳಿದ್ದ ಗೂಗಲ್‌ ಪೇ ಖಾತೆ ಯಾವ ಹೆಸರಿನಲ್ಲಿದೆ ಎನ್ನುವುದಕ್ಕೂ ಉತ್ತರಿಸಿ ಲಿಂಕ್‌ ವಾಪಸ್‌ ಕಳುಹಿಸುವುದರಲ್ಲಿದ್ದರು. ಲಿಂಕ್‌ ಭರ್ತಿ ಮಾಡಿ ಮುಗಿಯುತ್ತಿದ್ದಂತೆ ಅವರ ಖಾತೆಯಿಂದ 45 ಸಾವಿರ ರೂ. ಡ್ರಾ ಆಗಿರುವ ಮೆಸೇಜ್‌ ಬಂದಿದೆ. ಈ ಮೆಸೇಜ್‌ ನೋಡುತ್ತಿದ್ದಂತೆ ತಾವು ಸೈಬರ್‌ ಖದೀಮರ ಬಲೆಗೆ ಬಿದ್ದಿರುವುದು ಖಚಿತವಾಗಿದೆ. ಖಾತೆಯಲ್ಲಿದ್ದ ಉಳಿದ ಹಣವನ್ನು ತಮ್ಮ ಇನ್ನೊಂದು ಬ್ಯಾಂಕ್‌ ಖಾತೆಗೆ ವರ್ಗಾಯಿಸುವ ಪ್ರಯತ್ನದಲ್ಲಿದ್ದಾಗಲೇ ಮತ್ತೆ ಅವರ ಖಾತೆಯಿಂದ 50 ಸಾವಿರ ರೂ. ಡ್ರಾ ಆಗಿರುವ ಮೆಸೇಜ್‌ ಬಂದಿದೆ.

ಕೇವಲ ಲಿಂಕ್‌ ತೆರೆದ ಎರಡು ನಿಮಿಷಗಳಲ್ಲೇ ಖಾತೆಯಲ್ಲಿದ್ದ ಅಷ್ಟೂ ಹಣವನ್ನು ಲಪಟಾಯಿಸಲಾಗಿದೆ. ಈ ಬಗ್ಗೆ ಸೈಬರ್‌ ಠಾಣೆಗೆ ದೌಡಾಯಿಸಿದರೆ ಬೆಂಗಳೂರಿನ ಸೈಬರ್‌ ಠಾಣೆ ಪೊಲೀಸರು ಈಗಾಗಲೇ ದೂರು ದಾಖಲಿಸುವುದನ್ನೇ ನಿಲ್ಲಿಸಿಬಿಟ್ಟಿದ್ದಾರೆ. ಈ ಕಾರಣದಿಂದ ಮಡಿವಾಳ ಠಾಣೆಗೆ ತೆರಳಿ ದೂರು ನೀಡಿದ್ದಾರೆ.

ದೂರು ದಾಖಲಿಸಿಕೊಂಡರಾದರೂ ಸೈಬರ್‌ ಖದೀಮರನ್ನು ಪತ್ತೆ ಹಚ್ಚುವುದು ಕಷ್ಟ ಎಂದು ಪೊಲೀಸರು ಕೈಚೆಲ್ಲಿದ್ದಾರೆ. ಅನಾರೋಗ್ಯದಿಂದ ಬಳಲುತ್ತಿರುವ ತಾಯಿಗೆ ಚಿಕಿತ್ಸೆ ಕೊಡಿಸುವುದಕ್ಕಾಗಿ ಉಳಿತಾಯ ಮಾಡಿದ್ದ ಹಣ ಈ ರೀತಿ ಕಳ್ಳತನ ಆಗಿದೆ ಎಂದು ಶೇಕ್‌ ಸಂಕಟ ತೋಡಿಕೊಂಡಿದ್ದಾರೆ.

”ಆನ್‌ಲೈನ್‌ ಬ್ಯಾಂಕಿಂಗ್‌ ಮೂಲಕ ವಂಚಿಸಲು ಮತ್ತು ಖಾತೆಗೆ ಕನ್ನ ಹಾಕಲು ಸೈಬರ್‌ ಖದೀಮರು ಸಾವಿರಾರು ಮಾರ್ಗಗಳನ್ನು ಕಂಡುಕೊಂಡಿದ್ದಾರೆ. ದಿನಬೆಳಗಾದರೆ ನೂರಾರು ದೂರುಗಳು ಬರುತ್ತಿವೆ. ಸಾರ್ವಜನಿಕರೇ ಈ ಎಚ್ಚರಿಕೆ ವಹಿಸುವುದು ಒಳ್ಳೆಯದು. ಯಾವ ದೇಶದ ಯಾವ ಮೂಲೆಯಲ್ಲಿಕುಳಿತು ಸೈಬರ್‌ ಕಳ್ಳರು ಖಾತೆಗಳಿಗೆ ಕನ್ನ ಹಾಕುತ್ತಿದ್ದಾರೆ ಎನ್ನುವುದನ್ನು ಪತ್ತೆಹಚ್ಚುವುದು ಕಷ್ಟ” ಎಂದು ಪೊಲೀಸರು ತಿಳಿಸಿದ್ದಾರೆ.

Related posts

ಇಡೀ ವಿಶ್ವ ಒಂದಾಗಿ ಇರಾನ್‌ ವಿರುದ್ಧ ಹೋರಾಡಬೇಕಾಗಿದೆ: ಡೊನಾಲ್ಡ್‌ ಟ್ರಂಪ್‌ ಗುಡುಗು

Times fo Deenabandhu

ನಗ ನಗದುಗಳೊಂದಿಗೆ ಮಾವನ ಮನೆಯಿಂದ ರಾತ್ರೋರಾತ್ರಿ ಪರಾರಿಯಾದ ಮದುಮಗಳು

Times fo Deenabandhu

 ಐಟಿ-ಬಿಟಿ ಕಂಪೆನಿಗಳು ಕೆಲಸ ಆರಂಭಿಸಲು 14 ಷರತ್ತುಗಳ ಪಾಲನೆ ಕಡ್ಡಾಯ